АҞӘА, абҵара 18– Sputnik. Урыстәылатәи алаҵа "Спутник V" ала алаҵаҟаҵара иалагеит Аԥсны, абри атәы аанацҳауеит Аԥсны агәабзиарахьчара аминистрра апресс-маҵзура.
Аԥсны амедусҳәарҭақәа рҳақьым хадацәа алархәны агәабзиарахьчара аминистр Едуард Быҭәба имҩаԥигаз аилатәараҟны иҳәеит, алаҵаҟаҵарҭатә ҭыԥқәа уаанӡеиԥш аус рулоит ҳәа. Быҭәба иажәақәа рыла, Пицунда иаартхоит даҽа алаҵаҟаҵарҭатә ҭыԥ.
Уаанӡа алаҵа агаразы араионтә хәшәтәырҭа аҳакьымцәа есыҽны Аҟәаҟа иаауан. Быҭәба иҳәеит, уажәшьҭа мышқәак ирызхаша алаҵа аҭыԥантәи ахәшәтәырҭақәа рҟны ишҵәахызаауа, уи азы агәабзиарахьчара аминистрра араионтә хәшәтәырҭақәа архьшәашәагақәеи, иаарԥмырҟьаӡақәа афымцалашара анеиразы агенераторқәеи рыла ишеиқәдыршәаз.
Ҷыдала иалкаау амедусзуҩцәа уахыи-ҽни ахәшә аҵәахразы иаԥҵоу аԥҟарақәа рынагӡара хылаԥшра арҭалоит. Убри аан иазгәаҭоуп, Аҟәеи Аҟәа араиони алаҵа уаанӡеиԥш ирыҭалахоит ҳәа.
"Спутник лаит" ала алаҵаҟаҵара аанкылахоит, иаанхаз 500 лаҵа уаанӡа "Спутник V" ҟазҵаз реиҭалаҵаҟаҵаразы иҵәаххоит.
Аԥсны агәабзиарахьчара аминистрраҟны иара убас ирҳәеит, алаҵа ҟазҵаз, QR-код аиуразы азыҳәа ҟаҵаны, аха алогини апароли змауз алаҵа ахьыҟарҵаз аҭыԥ иадҵааларц.
Акоронавирус аҟынтәи урыстәылатәи "Спутник V" 6000 лаҵа иҟоу раԥхьатәи ахәҭа Аԥсныҟа иааргеит абҵарамза 16 рзы. Уажәтәи алаҵа аахәоуп аҳәынҭқарратә биуџьет ахарџь ала.