АҞӘА, абҵара 22 – Sputnik. Акоронавирус 5-10 шықәса уацәызыхьчаша алаҵа аҭыжьра иҟалар зылшо авирус аштаммқәа ирхьырԥшуп, ҳәа РИА Новости иазеиҭеиҳәеит Гамалеи ихьӡ зху амикробиологиеи аепидемиологиеи ринститут аиҳабы, COVID-19 аҟынтә алаҵа "Спутник V" аԥызҵаз Александр Гинцбург.
Иара иҳәеит аҵарауаа шақәгәыӷуаз "Спутник V" иҟоу аштаммқәа шықәсык-ҩышықәса ихнаҽып ҳәа.
"Аха аштамм аҽаԥсахит. Уи иахҟьоит алаҵа ес-фымз аҟаҵара аҭаххара. Зегь зыхҟьо иарбан ахк ҿыцу иҳаднагало ауп", - ҳәа иҳәеит Гинцбург.
Уаанӡа Гамалеи ихьӡ зху Ацентр аҿы ирҳәахьан COVID-19 аҟынтә алаҵа амчхара шықәсыбжак аҩнуҵҟа иԥсыҽхоит ҳәа. Аиҭалаҵаҟаҵара уи аамҭа иацнаҵоит.
2020 шықәсазы Урыстәыла агәабзиарахьчара аминистрра ашәҟәы иҭанагалеит алаҵа "Спутник V". Ари алаҵа адунеи аҟны раԥхьаӡа акәны COVID-19 хызҽуа ҳәа иԥхьаӡоуп.
Анаҩс ашәҟәы иҭаргалеит алаҵақәа - "ЭпиВакКорона" (новосибирсктәи ацентр "Вектор"), "КовиВак" (Урыстәылатәи аҭҵаарадыррақәа ракадемиа иатәу М.П. Чумаков ихьӡ зху Аиммунологиатә препаратқәа рыҭҵаареи аус рыдулареи рфедералтә ҭҵаарадырратә центр), "Спутник V" актәи ахәҭа "Спутник Лайт".