АҞӘА, ԥхынҷкәын 7 - Sputnik. Ииасыз аӡынтәи асезон иаҿырԥшны Аԥсны ашықәс ҿыц азы аԥсшьара зҭаху ҩынтәны еиҳахеит ҳәа азгәарҭоит Урыстәылатәи атуроператорцәа. Абри атәы аанацҳауеит "Вестник АТОР".
Атуроператор "Дельфин" аҳәамҭа ҟанаҵеит аҭирақәа ҩынтәны ишхалаз, TUI Россия аҟазауаа – ԥшьынтәны ишхалаз. Атуроператор "Мультитур", аекспертцәа ирҳәоит ари ахырхарҭала азыҳәақәа 15-18% ирыцлеит ҳәа.
Атуроператор "Интурист" аҩныҵҟатәи атуризм аҟәша аиҳабы Сергеи Стребков иажәақәа рыла, Аԥсны егьырҭ ахырхарҭақәа раасҭа аҿаҵарақәа аиуеит. Аԥсны Урыстәыла ишаҵакырамгьы атуристтә хсаалаҿы "аҩныҵҟатәи атуризм" ҳәа иарбоуп, атуристцәа Адлер аҳаирбаӷәаза рхы иахьадырхәо азы.
Убри аан Аԥсны Шәачеи Ҟрыми иреиԥшым, ара QR-кодқәа ма ПЦР-тестқәа аҭахӡам. Аковидҿагыларатә ԥкрақәа рыҟамзаара Аԥсныҟа атуристцәа хьанарԥшуеит.
"Апрактика ишаҳнарбо ала аҽа ҩымчыбжьгьы аҭахрақәа ирыцлалоит. Макьаназы аԥсшьара еиҳа иахьалырхыша иазхәыцуеит атуристцәа жәпаҩык", - иҳәоит Стребков.
Иара иқәшаҳаҭуп атуристтә џьармыкьа егьырҭ алахәылацәагьы.
Урыстәыла атуроператорцәа р-Ассоциациаҿ иазгәарҭоит Аԥсны атоп-хыбрақәа реиҳарак stop sale ықәдыргылахьеит аныҳәамшқәа рзы, аха макьанагьы иҭацәу аҭыԥқәа рыԥшаара алшоит ҳәа.
Аҭирақәа ааннакылахьеит апансионат "Самшитовая роща". Асасааирҭақәа жәпакы рҿы "иреиӷьӡоу ауадақәа" зегь аҿаҵоуп.
Атуроператорцәа "Русский Экспресс", ICS Travel Group рекспертцәа абжьгара ҟарҵоит Гагра, Афон Ҿыц, Пицунда аԥсшьара алырхырц, "Дельфин" аҟазацәа атуристцәа ирабжьыргоит Аҟәа азхьаԥшра арҭарц.
Аԥснытәи аԥсшьарҭатә ҭыԥқәа реиҳарак аԥсшьаҩцәа ирыдыргалоит аныҳәатә уаххьа, амилаҭтә чыс, агәмырҿыӷьга программа.