АҞӘА, ԥхынҷкәын 15 – Sputnik. Аԥсны Урыстәылаҟа аҳәара ҟанаҵеит афымцалашара аиуразы ЕгрыГЕС, Џьуартәи аӡеизакырҭаҿы аӡы аҩаӡара ашәарҭаратә лаҟәыраҿ аҟазаара иахҟьаны ҳәа иҳәеит Аслан Бжьаниа адепутатцәа рԥылараан.
"Алашара аиуразы иахәҭаны иҟоу ашәҟәқәа зегьы хиоуп. Иациижьҭеи ашәҟәы Урыстәыла аԥыза-министр Мишустин истол иқәуп. Иахәҭоу аӡбра аиуеит ҳәа ҳгәыӷуеит", - ҳәа иҳәеит Бжьаниа.
Аԥсны алашара аамҭа-аамҭала арцәаразы аамҭеихшара алагалоуп.
Уаанӡа адырра ҟаҵан адепутатцәа раԥшьгамҭала Аҳәынҭқарра ахада иԥылара апарламент аҟны ишымҩаԥгахо. Ԥхынҷкәын 15 азы ахада ипресс-маҵзура ахада иҳәамҭа ҟанаҵеит аиԥылара шымҩаԥгахо аковидҿагыларатә ԥкрақәа азгәаҭаны, асоциалтә дистанциа иқәныҟәаны Аминистрцәа реилазаараҿы аиԥылара шымҩаԥсуа. Адепутатцәа рыхәҭак аиԥылара Апарламент аҿы имҩаԥысыр акәын ҳәа иазԥхьаӡаны анеира мап ацәыркит.