АҞӘА, ԥхынҷкәын 29 – Sputnik. Урыстәыла аиҳабыра аус рыднаулоит иааиуа ашықәс азы атәыла аҩнуҵҟатә џьармыкьаҿ абылтәы ахә ацлара аанкыларазы аԥҟарақәа ҳәа иҳәеит Урыстәыла аԥыза-министр ихаҭыԥуаҩ Александр Новак, РБК аинтервиу аҭо.
"Ахәқәа анырра рырҭоит ахарџьқәеи акцизқәеи. Ари афактор аҭышәныртәаларазы аус рыдулоуп атәыла аиҳабыра рхада Михаил Мишустин адгылара зиҭаз амеханизм арҽеиразы ажәалагалақәа", - иҳәеит Новак, 2022 шықәсазы абылтәы ахә иацло иацымло ҳәа ирҭаз азҵаара аҭакс.
Иара иҳәеит 2021 шықәсазы аиндикативтә хәыԥса адемпфертә формула 1,8 нызқь мааҭ рыла иларҟәын, 2022 шықәса ажьырныҳәа 1 азы иара абри аҟарала еиҭашьақәгылахоит ҳәа азԥхьагәаҭан.
"Ари аӡбамҭа ахәқәа ирнырит, убри азы аиҭашьақәыргылара мап ацәкызарц азгәаҭоуп. Иааиуа ашықәс азы аиндикативтә хәыԥса адемпфертә формула аиндексациа азухоит 3% рыла, убри аан аинфлиациа еиҵахоны. Абри ашьҭахь аиндикативтә ҩаӡара еиҵахоит", - иҳәеит иара.
Новак иара убасгьы иҳәеит ишацҵахо акомпенсациа аҩаӡара – 68% инаркны 83% рҟынӡа.
Уи адагьы, иацҵахоит абиржаҿы абылтәы аҭира анорматив 11% инаркны 12 процент рҟынӡа, адизельтә былтәы - 7,5% инаркны 8,5% рҟынӡа.
Адемпфертә механизм аԥҵан Урыстәыла аҩнуҵҟатә џьармыкьаҿы ахәқәа раанкыларазы. Амеханизм инақәыршәаны, абылтәи адизельтә былтәи рекспорттә хәыԥса аҩнуҵҟатә хәыԥса еиҳазар аҳәынҭқарра ари аивыгара аилахәырақәа ирзашәоит. Аҩнуҵҟатә хәыԥсақәа аекспорттәқәа иреиҳазар - анефҭыҵхыҩцәа рхашәала ахәҭа аҳәынҭқарра ианаҭоит.