АҞӘА, ԥхынҷкәын 30– Sputnik, Наала Гәымԥҳа. Ааигәа Аԥсны аҵареи абызшәатә политикеи рминистр Инал Габлиа дырҭааит Москвеи Мински ақалақьқәа. Иусутә ныҟәара аҳәаақәа ирҭагӡаны имҩаԥысит еиуеиԥшым аиԥыларақәа, ирыбжьарҵеит аиқәшаҳаҭрақәа. Инал Габлиа иазгәеиҭеит Минск имҩаԥгаз аиԥыларақәа алҵшәа бзиа шаадырԥшыз, урҭ Аԥсны аҵарадырра ԥхьаҟатәи аԥеиԥш ишаацхраауа.
"Аԥснытәи аделегациа Минск аҭаара лҵшәа бзиоуп, шьаҿа хадоуп ҳәа азысыԥхьаӡоит. Ибзиаӡаны ҳрыдыркылеит, имҩаԥган аиԥыларақәа жәпакы. Иҳаман алшара еиуеиԥшым аусбарҭақәа рҭаара. Раԥхьа ҳаҭааит Белоруссиатәи ашәҟәыҩҩцәа реидгыла, анаҩс ауаажәларатә еидгыла "Белая Русь". Ҳарҵаратә система арҿиареи аизырҳареи рганахь ала иҳамоу алшарақәа ҳрылацәажәеит. Аҵара аганахьала дареи ҳареи ҳколлеџьқәа рыбжьара аусеицуразы аиқәшаҳаҭра ҳабжьаҳҵеит, иара убас арҵаҩцәа рзанааҭдырра аизырҳаразы уахь ицалартә еиԥш азин ҳабжьаҳҵеит", - ҳәа иҳәеит Инал Габлиа.
Аминистр далацәажәеит Аҟәа иаартхо амедицинатә класс. Иара иазгәеиҭеит уи аҩыза алшара ҳарҵаратә процесс акыр ишацхраауа атәы.
"Москва имҩаԥысуаз ҳаиԥыларақәа руак аҟны ҳазааҭгылеит Аҟәа амедицинатә класс аартра азҵаара. Ишдыру еиԥш, Аԥсны ирацәоуп аҿар амедицина азанааҭ алзхуа, акласс аартра акыр иарманшәалоит ҳәа сахәаԥшуеит. Ҳәарада, уи ахарџь ду аҭаххоит, аха сгәы иаанагоит Аԥсны ахадара адгылара ҳарҭап ҳәа", - азгәеиҭеит Инал Габлиа.
Иара убас, Инал Габлиа даҭааит арҵаратә лабораториа "Ресурсный центр", "ЭкоТехноПарк"-Волма". Араҟа иҿыцзоу атехнологиала иазыҟарҵоит аенергетикцәа, афымцазҟазацәа, асантехникцәа уҳәа убас еиуеиԥшым аҟазацәа.
Аԥснытәи аделегациа аҭааит Урыстәылатәи арҵаратә академиа, уаҟа ирԥылеит академиа ахада Ольга Васильевеи ахада ихаҭыԥуаҩ Геннади Онищенкеи. Академиа анапхгареи дареи ирылацәажәеит аԥхьаҟатәи русеицура ашьаҿақәа. Ирыбжьарҵаз аиқәшаҳаҭрала 2022 шықәсазы Аҟәа иаартхоит Урыстәылатәи аҵаратә академиа ацентр.
Инал Габлиа иҳәеит ԥхынҷкәын мзазы Аԥсныҟа ишаагаз 160 нызқь арҵагатә шәҟәқәа, урҭ ирыхшәаан хынҩажәа миллион мааҭ. Аҵара аминистр иҭабуп ҳәа раиҳәеит Урыстәыла анапхгара иҟарҵаз адгылара азыҳәан.
Апресс конференциа хыркәшо аҵареи абызшәатә политикеи рминистр Инал Габлиа иҳәеит, ажьырныҳәа ԥшьба инаркны аабанӡа Аҟәа ишымҩаԥысуа жәларбжьаратәи аӡынтәи ашкол "Ашықәс арҵаҩы". Урыстәылантәи Аԥсныҟа иаауеит иреиӷьу арҵаҩцәа, амилаҭтә арегионалтә еицлабрақәа рыҟны "Ашықәс арҵаҩы" ҳәа ахьыӡ иаԥсахаз. Урҭ рдырра рымардоит аԥсуа рҵаҩцәа. Габлиа иазгәеиҭеит уи аҵара асистема аиӷьтәра акыр ишацхраауа.