АҞӘА, ажьырныҳәа 5 - Sputnik. Ҟазахсҭан ауаа рацәа злахәу аҿагыларатә акциақәа мҩаԥысуеит аӡшьартә газ ахә ахьышьҭыҵыз инамаданы, аҿагыларатә акциақәа аибарххара ӷәӷәақәа рахь ииасит. Абыржәтәи аамҭазы аҭагылазаашьа зеиԥшроу атәы шәаԥхьа Sputnik аматериал аҿы.
Ҽынла ажьырныҳәа 5 рзы аҿагыларатә акциақәа рахь ицәырҵыз ауаа Алма-Ата иҟоу Ҟазахсҭан ахада Касым-Жомарт Токаев дахьыҩноу аиҳабыратә хыбра иҩналаны иааныркылеит ҳәа адырра ҟарҵеит АИХқәа.
Уаанӡа адырра ҟалахьан зықьҩыла ажәлар атәыла ахада ихыбрахь иҩналаразы иадеизалахьан ҳәа.
Ҟазахсҭан ахада ауаажәларра рахь ихы нарханы дықәгылараны дыҟоуп атәылаҿы ауаа рацәа злахәу аҿагыларатә акциақәа рҵыхәала. Ари шьҭа ҩынтәхоит аҵыхәтәантәи ҩымш рыла иара ажәлар рахь аҳәамҭа ҟаиҵоижьҭеи ҳәа аанацҳауеит РИА Новости.
Урыстәыла зҿлымҳарыла Ҟазахсҭантәи аҭагылазаашьа иацклаԥшуеит ҳәа рҳәеит Адәныҟатәи аусқәа рминистрраҿы. Дара иаарласны иҭышәынтәалахап ҳәа агәыӷра аадырԥшит.
Кремль аҿгьы аҭагылазаашьа ахҳәаа арҭеит. "Акыр ихадоуп аӡәгьы анҭыҵынтә иҽалаимгалар", - ҳәа азгәеиҭеит Урыстәыла ахада ипресс-маӡаныҟәгаҩ Дмитри Песков.
Ишьақәгылаз аибарххарақәа ирыхҟьаны "Ҟазахтелеком" атәыла зегь аҿы аинтернет арцәеит. Ҟазахсҭан асаитқәа аҳәаанырцәынтәгьы иузаартуам. GlobalCheck адыррақәа рыла, Алма-Атеи Нур-Султани аҭелтә еимадарагьы аус ауам.
Алма-Ата акомендант аҳәамҭа ҟаиҵеит аҿагылара аазырԥшуа рнапаҟынтәи 500-ҩык атәылауаа аахақәа шроуз, урҭ рхыԥхьаӡараҿы 130-ҩык аҳәсеи аҭаҳмадцәеи. Апоилициаа зҽырцәгьаны иҟаз раанкыларазы алашарабжьытә рԥжәагақәа рхы иадырхәеит.
Ҟазахсҭан аҿагыларатә акциақәа ирылагеит ашықәс ҿыц ҳшынҭалаз еиԥш. Ақалақьқәа Жанаозени Актауи рҟны инхо ауааԥсыра амитингқәа рахь ицәырҵуан аӡшьартә нефҭтә газ ахә ҩынтә иахьышьҭыҵыз иаҿагыло. Атәыла ахада Касым-Жомарт Токаев анапынҵа ҟаиҵеит аҭагылазаашьа ҭызҵаауа акомиссиа аԥҵазарц, уи акомиссиа ажьырныҳәа 4 рзы адырра ҟанаҵеит аҿагылара аазырԥшуа ауаа ирхаҵгыланы агаз ахәԥса аларҟәра ишазыхиоу. Аха аҿагыларатә акциақәа егьырҭ ақалақьқәа рахьгьы ииасит. Ахаша ажьырныҳәа 5 рзы Алма-Ата ақалақь ахадара ахыбра иажәлеит, амцагьы ацрарҵеит. Уа иаларгалеит ажьырныҳәа 19 рҟынӡа аҭагылазаашьа ҷыда арежим.
Ҟазахсҭан ахада Токаев атәыла аиҳабыра ԥхьатәара ишьҭит ишьақәгылаз аибарххарақәа рзы ахара рыдҵо. Уи адагьы, иара адҵа ҟаиҵеит аӡшьартә гази абылтәи рыхәԥса шықәсыбжак иалагӡаны аҳәынҭқарра иҭышәыннартәаларазы.