АҞӘА, ажьырныҳәа 8 - Sputnik. Аԥсны агәҭынчымра ҳазцәырнагеит Ҟазахсҭан имҩаԥысуа ахҭысқәа, адгыларагьы раҳҭоит атәыла анапхгара азинлеишәа ашьақәыргыларазы рҽазышәарақәа иҳәеит Аԥсны ахада Аслан Бжьаниа. Аҳәамҭа кьыԥхьуп Аҳәынҭқарра ахада иофициалтә саит аҟны.
"Аҵыхәтәантәи амшқәа рзы Ҟазахсҭан имҩаԥысуа ахҭысқәа агәҭынчымра ҳазцәырнагеит. Аҿагыларатә акциақәа, анаҩс амч ахархәареи аимҵәареи рахь ииасыз атәыла ауааԥсыра рыԥсҭазаара ашәарҭара иҭанаргылеит", - ҳәа аҳәоит Бжьаниа иҟаиҵаз аҳәамҭа аҟны.
Аԥсны ахада иазгәеиҭеит, Ҟазахсҭан акзаареи, ашәарҭадареи, аконституциатә шьақәгылашьеи аҵшәааразы иҟаз аҽазышәара ишырныубаало адәныҟантәи аҽалархәра.
"Адгылара раҳҭоит Ҟазахсҭан анапхгара имҩаԥырго азинлеишәа ашьақәыргыларазы рҽазышәарақәеи атәыла ауааԥсыра ршәарҭадара аԥҵареи. Иазаҳаԥхьаӡоит иузудымкыло акәны асуверентә ҳәынҭқарра аҩнуҵҟатәи аусқәа изакәанымкәан атәым ҳәынҭқаррақәа рҽалархәра, ауаажәларра-политикатә ҭагылазаашьа ашьақәырҟьара хықәкыс иҟаҵаны, анаҩс ацәгьоуцәа ргәыԥкәа рыцхыраарала амчра бџьарла анапахьы аагаразы", - иҳәеит Бжьаниа
Иара Ҟазахсҭан иқәынхо ажәлар ирзеиӷьеишьеит иаарласны атәылаҿы азакәанмчра ашьақәгылареи, аҭынчреи, аманшәалареи, аизҳазыӷьареи.
Ҟазахсҭан аҿагыларатә акциақәа ирылагеит ашықәс ҿыц ҳшынҭалаз еиԥш. Мангистаутәи анефҭааглыхратә раион ақалақьқәа Жанаозени Актауи рҟны инхо ауааԥсыра амитингқәа рахь ицәырҵит амашьына абылтәы ҳасабла иҭарҭәо аӡшьартә нефҭтә газ ахә ҩынтә иахьышьҭыҵыз иаҿагыло.
Ажьырныҳәа 6 ауха Токаев имҩаԥигеит Ашәарҭадаратә хеилак иара инапхгарала ираԥхьатәихаз аилатәара, уи аҟны аҳәамҭа ҟаиҵеит Ҟазахсҭан ишьақәгылаз аҭагылазаашьа "аҳәынҭқарра акзаара ҵызшәаауа" шакәу, адыррагьы ҟаиҵеит ОДКБ ахь аҳәара шыҟаиҵаз "атеррористтә шәарҭара ахыхраҟны ирыцхрааразы".