АҞӘА, ажьырныҳәа 12 - Sputnik. 2022 шықәса раԥхьатәи жәамш ирылагӡаны Риҵатәи амилаҭтә парк иаҭааит 13 284-ҩык аԥсшьаҩцәа, Афонҿыцтәи аҳаԥы - 9 414-ҩык, абри атәы аҩуеит аинформациатә маҵзура "Аԥсныпресс" Аԥсны атуризм азы аминистрра адыррақәа шьаҭас иганы.
Риҵатәи ареликттә милаҭтә парк аиҳабы Адамыр Багаҭелиа уи аԥхьа Sputnik иазеиҭеиҳәахьан, ажьырныҳәа 1 инаркны 3-нӡа аӡиа ишаҭааз хәнызқьҩык инарзынаԥшуа аԥсшьаҩцәа ҳәа. Иара иажәақәа рыла, ҵыԥхтәи ашықәс ари аамҭазгьы Риҵа иаҭааз рхыԥхьаӡара убри аҟара ыҟан.
Багаҭелиа иазгәеиҭеит, Риҵанӡа амашьынақәа халарц азын иҷыдоу аусбарҭақәа лассы-ласс амҩа асы шанырго, аԥслымӡ шкарԥсо, илаҟәу амашьынақәа аӡынтәи агьежьхарԥа зҵоу ԥықәсыларыда ихалар шрылшо.
Убри аан иара адырра ҟаиҵеит Ауадҳараҟа узго амҩа шарку асыԥса леир ахьалшо иахҟьаны.
Афонҿыцтәи аҳаԥы адиректор ихаҭыԥуаҩ Ахра Ԥачалиа ишеиҭеиҳәаз ала, ажьырныҳәа 1 инаркны 3-нӡа аҳаԥы иҭалеит 3 947-ҩык, 2021 шықәсазы раԥхьатәи хымш рыла аҳаԥы иҭалаз рхыԥхьаӡара 3 260-ҩык ыҟан.