АҞӘА, ажьырныҳәа 19 - Sputnik. Ауаԥс режиссиор Аслан Галазов Фазиль Искандер иажәабжьқәа ирылхны иҭихыз асахьаркыратә фильм "Чик ихәыҷра" ахәаԥшцәа иддырбоит Владикавказ, жәабран 3 аҽны ҳәа аанацҳауеит Sputnik Южная Осетия.
Арежиссиор Аслан Галазов иажәақәа рыла, Чик иахьатәи ахәаԥшҩы дидихалоит игәыҭбаара, аиаша иадгылара, иԥсыҽу рыхьчара, изхарамкәа хьымӡӷ здыргаз рывагыларала. Иара иҵоуроу фырхаҵоуп, хымԥадагьы аиашара дадгылаҩуп.
Аслан Галазов Фазиль Искандер иажәабжьқәа ирылхны афильм "Чик ихәыҷра" ҭихит 2019 шықәсазы, "Владикавказтәи аексперименталтә киностудиаҿы" Урыстәыла акультура аминистрра адгыларала.
Аепизод хадақәа ҭыхын Аҟәа амшын аԥшаҳәаҿы, "Брехаловка" ҳәа ззырҳәо акаҳуажәырҭаҿы, адрамтеатр аҿы, ашкол аҿы, Алашарбага араион аҿы.
70-ҩык актиорцәа алахәын.
Иҭырхуаз зегьы азанааҭтә ҵара рымамызт, аха зегьы аԥснытәқәан. Ароль хада неигӡеит аҟәатәи аҵаҩы, 14 шықәса зхыҵуаз Давид Ҵулукьиа.