АҞӘА, ажьырныҳәа 25 - Sputnik. Гагра араион аҿы ашколқәеи ашколқәранӡатәи аусбарҭақәеи 2022 шықәса жәабран 1 аҟынӡа иадыркуеит, абри атәы аанацҳауеит араион ахадара апресс-маҵзура.
Абри азы аусԥҟа инапы аҵаиҩит араион ахада Иури Хагәышь.
Адокумент инақәыршәаны Гагра асанитартә маҵзура акрыфарҭақәеи ахәаахәҭратә хыбрақәеи рҿы ахылаԥшра арӷәӷәарц адҵа ҟанаҵоит.
Ажьырныҳәа 24 азтәи адыррала Аԥсны аепидемиа ҵысижьҭеи аҿкчымазара зыхьхьоу ауаа рхыԥхьаӡара 40398-ҩык рҟынӡа инаӡеит. Ари амш азы агәаҭара иахысыз 1036-ҩык рҟынтәи 538-ҩык авирус рыдбалан.
Акоронавирус омикрон-штамм, B.1.1.529, аарԥшын Ботсванеи Аладатәи Африкеи абҵарамзазы. Аҟазауаа ишырҳәо ала, иара шьҭыркаар рылшоит ачымазара зхызгахьоугьы, алаҵа ҟазҵахьоугьы. Иара акыр еиҳа иццакны ирылаҵәоит авариант "дельта" аасҭа. Аштамм азгәарҭахьеит 110 тәыла рҿы, Аԥсынгьы абрахь иналаҵаны. Авирусологцәа аӡәырҩы омикрон ОРВИ еиԥшуп ҳәа иршьоит.