АҞӘА, жәабран 1- Sputnik. Аԥсни Урыстәылеи рыбжьара асоциалтәи аекономикатәии азеиԥш еилаӡара аиҿкаараз Апрограмма анагӡараз азҵаарақәа рзы аусутә гәыԥ аилатәара мҩаԥган ажьырныҳәа 31 азы, Москва. Абри атәы аанацҳауеит Агәабзиарахьчара аминистрра апресс-маҵзура.
Аганқәа иҭырҵааит аинвистициатә, ашәахтә, аҵаратә, аҳазалхратә, агәабзиарахьчаратә усхкқәа рҿы азинтә ҭышәынтәалара азҵаарақәа.
Аусутә гәыԥ Аԥснытәи аган иалахәуп: аԥыза-министр ихаҭыԥуаҩ, аекономика аминистр Кристина Озган, Агәабзиарахьчара, Аиустициа, Ашәахтәқәеи аизгақәеи, Аҵареи рминистррақәа рхадацәа, Аԥсны ААРи Аҳазалхратә еилаки рхаҭарнакцәа.
Урыстәылатәи аган хадара азиуеит Аекономикатә ҿиара аминистр ихаҭыԥуаҩ Дмитри Вольвач.
Аслан Бжьаниеи Владимир Путини реиԥылара ашьҭахь 2020 шықәса, абҵарамзазы ишьақәырӷәӷәан Аԥсни Урыстәылеи рыбжьара асоциалтәи аекономикатәии зеиԥш еилаӡара аиҿкаараз Апрограмма.