АҞӘА, жәабран 4 – Sputnik. Аԥсны Алхратә комиссиа хадаҿы ашәҟәы иҭаргалеит адепутатразы акандидатцәа рықәыргыларазы аԥшьгаратә гәыԥқәа 114.
Ахәаша, жәабран 4 азы аԥшьгаратә гәыԥқәа ҩба ҭарҩит:
Бганԥҳа Анетта - 8-тәи алхратә ҭыԥ хада (Алашарбагатәи),
Ашәԥҳа Мактина - 2-тәи тәи алхратә ҭыԥ хада (Аҳабла ҿыц).
Иара убас, ахәаша жәабран 4 азы аполитикатә партиа "Аиашареи аҿиареи рзы Аԥсны жәлар рыфронт" Апарламент ахь акандидат дықәнаргылеит. Аԥсны Алхратә комиссиа хадаҿы ирыдгалан апартиа аизара аԥкаанҵа.
Аизара аӡбамҭала Сақаниа Лаша Галтәи алхырҭатә ҭыԥ хада №35 аҟны кандидатс дықәгылоит.
Жәабран ԥшьба азы иҟоу аҭагылазаашьала АКХ аҿы иҭаҩуп аԥшьагаратә гәыԥқәа 114, аполитикатә партиақәа хәба. Асиа зегьы шәаԥхьар шәылшоит абра.
Жәлар Реизарахь алхрақәа мҩаԥгахоит хәажәкыра 12 2022 шықәса азы, иалххоит 35-ҩык адепутатцәа.
Апарламент ахь адепутатцәа ықәзыргыло аполитикатә партиақәеи аԥшьгаратә гәыԥқәеи ашәҟәы рҭагалара мҩаԥысуеит жәабран 10 рҟынӡа. Адепутатразы акандидатцәа ҭарыҩраны иҟоуп жәабран 10 инаркны хәажәкыра 2 рҟынӡа.