АҞӘА, жәабран 13 - Sputnik. Урыстәыла Аолимпиатә еилакы ашәаҩаҵшьратә еиԥхныҩларақәа рзы ахацәа ркоманда Пекин Аолимпиатә хәмаррақәа рҟны аиааира ргеит 4х10 км иҟаз абжьаӡараҟны ҳәа аанацҳауеит РИА Новости.
Акоманда иалан Алексеи Червоткин, Александр Большунов, Денис Спицов, Сергеи Устиугов. Изнысран иҟаз амҩа иахысит 1 сааҭки 54 минуҭи 50,7 секунд рыла.
Аицлабрақәа мҩаԥысуан ԥшь-етапкны имҩаԥысуан - актәи ҩ-етапк классикатә стильла, егьырҭ - ахы иақәиҭны. Урыстәылаа рзы Норвегиа акоманда акәын реиҳа ишәарҭаз.
Аҵыхәтәан ари аҩыза аицлабраҟны аурыс команда аиааира агахьан 42 шықәса раԥхьа - 1980 шықәса рзы Леик-Плесид. Урыстәыла иҿыцӡоу аҭоурых аҿы ҩынтә араӡны ргахьан - 2014 шықәса рзы Шәача, 2018 шықәса рзы - Пхенчхан.
Аспортсменцәа риааира абзоурала Урыстәыла уажәшьҭа аԥшьбатәи ахьтәы медал рымоуп. Иацы аҭыԥҳацәа ашәаҩаҵшьратә спортхкы аҟны ахԥатәи ахьтәы медал иаиааит - 4х5 километр иҟоу абжьаӡара 53 минуҭи 41,0 секунди рыла.
Пекин имҩаԥысуа Аолимпиатә хәмаррақәа рҟны актәи ахьтәы медал даиааит аскиатлон аҟны раԥхьа инеиз Александр Большунов. Аҩбатәи ахьтәы медал иаиааит урыстәылатәи аҵаақәшьқьырыҩцәа ркоманда, аха Жәларбжьаратәи аолимпиатә еилакы уи агәрамгара рызцәырнагеит Камила Валиева адопинг лылан ҳәа ицәырыргаз аимак-аиҿак азы.