АҞӘА, жәабран 15 – Sputnik, Бадраҟ Аҩӡба. 2021 шықәсазы 396 миллиони 340 нызқь мааҭ еизган ҳәа иҳәеит АУН "Амшынеиқәафымцамч" афымцамч аҭираз аҟәша аиҳабы Алхас Ҷанба Sputnik аҿы имҩаԥысыз апресс-конференциаҿ.
Ари 41,7 процент артәоит иҳәеит Ҷанба.
2019 шықәсазы еизган 366 миллиони 963 нызқь мааҭ - 54,3%. 2020 шықәсазы еизган 322 миллиони 114 нызқь мааҭ – 40,3%.
100 миллионк инеиҳаны еизгоу ахьеизнагаз Аҟәа ақалақь аҿоуп.
Ареспубликаҿ иалагалоу аамҭа-аамҭалатәи афымца арцәара далацәажәо Ҷанба иҳәеит ари ада ԥсыхәа шыҟамыз. Убри аан иазгәеиҭеит афымцалашараз аԥарашәареи инарышьҭуа амчхареи шеидҳәалоу. Атәылауаа аԥарашәара иаҟәыҵыр ареспублика иамоу алашарагьы ацәыӡыр шалшо.
Аԥсны афымцатә ҳа ауадаҩра дуқәа амоуп изҵоу аидарақәеи аинфраструктура ахареи ирыхҟьаны. Уи инадҳәаланы ареспубликаҿ акриптоԥара арҳарагьы азин ҟаҵам.
2021 шықәса ԥхынҷкәын 21 аахыс Аԥсны аиҳарак алашара Урыстәылантәи иаиуеит. Аамҭеихшала афымцалашара арцәарақәа аԥыхуп аидарақәа ирыхҟьаны аԥкрақәа рыда.
Уаанӡа "Амшынеиқәафымцамч" аҟны ирҳәеит абри арыцхә инаркны авольтҳарак цәаҳәақәа "Шьешьелеҭ-1", "Шьешьелеҭ-2", ЕгрыГЕСи ГЕС-1 рҟынтә алашара шырго. Очамчыра, Гәылрыԥшь, Гал араионқәа урҭ роуп лашарала еиқәзыршәо. Аха Џьуартәи аӡеизакырҭаҿы аӡы лаҟәуп уи иахҟьаны ареспублика мрагыларатәи ахәҭаҿы аамҭа-аамҭала алашара арцәара алагалоуп.