АҞӘА, жәабран 24 – Sputnik. Аԥсны Апрокуратура хада Жәлар Реизарахь алхрақәа раамҭазы аусура арӷәӷәоит ҳәа аанацҳауеит аусбарҭа асаит.
Апрокурор хада иусдҵа инақәыршәаны азакәанԥҵара иазыԥхьагәанаҭо ашшыԥхьыӡқәа ианаамҭоу рыҭҵаара еиҿкаатәуп, аԥсшьарамшқәа раангьы.
Уи адагьы апрокуратура хада аусузҩцәа алхрақәа раамҭазы атәылауаа рыдкыларазы иҷаԥшьалоит, азакәанқәа рықәныҟәареи, агитациақәа рымҩаԥгареи, аԥаразоужьреи ирышьклаԥшлоит.
Ацәгьоуратә ҟазшьақәа раарԥшраан апрокуратура иахәҭоу агәаҭарақәа хацнаркуеит.
Адепутатрахь акандидатцәа ашәҟәы рҭагалара хыркәшахоит хәажәкыра 2 азы.
Жәлар Реизарахь алхрақәа мҩаԥгахоит хәажәкыра 12 рзы. Жәлар Реизарахь иалххоит 35-ҩык адепутатцәа. Апарламент абыжьбатәи ааԥхьара ҳтәыла азакәанԥҵаратә политика аџьабаа азырбалоит иааиуа хәышықәса ирылагӡаны.