АҞӘА, жәабран 25 - Sputnik. Украинатәи арбџьармчқәа аиланхарҭа Куликово иалахысуан, абри аан атехника хьанҭа рхы иадырхәеит ҳәа рҳәеит Ахылаԥшреи аҳәаақәҵареи рзеиԥш центр ахаҭарнакраҿ ҳәа аанацҳауеит РИА Новости.
Аԥшьаша ашьыжь Урыстәыла ахада Владимир Путин ателехәаԥшрала алаҳәара ҟаиҵеит Донбасс арратә аоперациа ҷыда ишалаго азы. "Аҭагылазаашьа хырԥашьа змам, заамҭа гатәым ахымҩаԥгашьа ҳаднаҵоит. Донбасс жәлар рреспубликақәа ацхыраараз Урыстәыла иаҳәеит", - ҳәа. Иара иҳәеит, Москва Украина ақәлара агәы ишҭам, ирҭаху абџьар рхыхра шакәу.
Урыстәыла ахада иазгәеиҭеит, иҟалар зылшо ашьакаҭәараз иахьатәи украина анапхгара ишырхароу. Путин украинатәи аруаа рахьгьы ааԥхьара ҟаиҵеит украинатәи анапхгара иҟарҵо ацәгьоуратә дҵақәа нарымгӡарц, рабџьар шьҭаҵаны рыҩныҟақәа ицарц.
Урыстәыла атәылахьчара аминистрра аҟны ирҳәеит, аракетатә, авиациатә, артиллериала аума зынӡа украинатәи ақалақьқәа ишрыламхысуа. Аусбарҭа адыррала, икылкаау ахархәагала Украинатәи арратә инфраструктуреи, аҳаиртә хыхьчаратә хархәагақәеи, арратә ҳаирбаӷәазақәеи русура еиԥдырҟьоит. Убри аан Украина аҳәаахьчаҩцәа "аҿагылара руам" ҳәа азгәаҭоуп. Иара убас иазгәарҭеит аҭынч уааԥсыра ԥырхага шрыҭам.