АҞӘА, хәажәкыра 4 - Sputnik. Аҟәа ахадара Донецктәии Лугансктәии ареспубликақәа рҟынтәи ахәыҷқәа ашколқәеи ахәыҷбаҳчақәеи рахь рынашьҭра азҵаара рыӡбеит ҳәа аанацҳауеит ақалақь апресс-маҵзура.
"Иахьа Комаров ихьӡ зху афбатәи ашкол 5, 8, 9, 10 аклассқәа ирыҵаркуа аҵаҩцәа рзы ашәқәа аанартит. Аҵаҩцәа ԥхарра дула рықәлацәа рыдыркылеит. Ахәыҷқәа аус рыдылулоит аԥсихолог. Арҵаратә коллектив ахәыҷқәа рҵагашәҟәыла, иахәҭоу ахархәагақәа рыла, фатәы-ԥхала еиқәдыршәоит", - лҳәеит Аҟәа ахадара аҵара аусбарҭа аиҳабы Асҭанда Ҭаркьылԥҳа.
Иеиҵақәоу рзы арҵаҩцәа дара рахь иааиуеит. Ахәыҷбаҳчақәа ирыҵаркуа ахәыҷқәа "Звездочка" ахь иныҟәалоит.
Арҵаҩцәа аматериалтә цхыраарагьы ҟарҵоит. Убас, аҟәатәи аԥшьбатәи ашкол аҿы 40 нызқьмааҭи ацәамаҭәеи еизыргеит.
Донбассынтәи раԥхьатәи ахҵәацәа зҭаз автобусқәа ареспубликахь иааит жәабран 24 азы.
Аԥсны урҭ гәыкала ирыдкылан. Ацхыраара роуеит аиҿкаарақәеи аусбарҭақәеи иара убасгьы ауааԥсыра. Атәылауаа, аибашьра закәу бзианы издыруа, ахҵәацәа рыцхраара уалԥшьаны иахәаԥшуеит.
Ус шакугьы иахьа ихҵәаз ақәгәыӷуеит аибашьра еилганы ирласны рыҩнқәа рахь игьыжьып ҳәа.