АҞӘА, хәажәкыра 9 - Sputnik, Бадраҟ Аҩӡба. Аԥсны ахада Аслан Бжьаниеи Урыстәыла Аекономикатә ҿиара аминистр ихаҭыԥуаҩ Дмитри Вольвачи аекономика аусхк аҟны аҩтәылак русеицура азҵаарақәа ирылацәажәеит.
Вольвач инаҵшьны иазгәеиҭеит Урыстәылазы Аԥсны иазыҟанаҵо адгылара ртәылазы ихадоу ахырхарҭақәа иреиуоуп ҳәа.
Аслан Бжьаниа ихәҭакахьала Урыстәыла анапхгара иҭабуп ҳәа реиҳәеит акыршықәса инеиԥынкыланы есымша иҟанаҵо ацхырааразы.
Аԥсны ахада иара убас иазгәеиҭеит ҳтәыла ԥхьаҟагьы ишазхиоу ДЖәР-иЛЖәР-и рҟынтәи ахҵәацәа арыцхраара.
"Иахьа Урыстәылатәи Афедерациа иуадаҩу аамҭа иҭагылоуп, ҳара ҳазхиоуп Урыстәыла ажәлар рыдгылара. Шәара ижәдыруеит аиаигәа ҳара ДЖәР-и ЛЖәР-и рхьыԥшымрақәа шазхаҳҵаз, арҭ ареспубликақәа рҟнытәи ахҵәацәа ԥыҭҩык шҳадаҳкылаз, наҟ-наҟгьы ари ахырхарҭала аусура ҳазхиоуп. Иаҭаххаргьы, даҽа хырхарҭак алагьы аусеицура ҳазхиоуп", - иҳәеит Аԥсны ахада.
Дмитри Вольвач Аслан Бжьаниеи ҳҳәынҭқарра зегьи иҭабуп ҳәа реиҳәеит Донецктәии Лугансктәии Жәлар Рреспубликақәа ахьазхарҵаз, иара убас Аҟәа ахҵәацәа ахьрыдыркылаз.
"Сара сгәаанагарала, ишьақәгылаз аҭагылазаашьаан ҳтәылақәа ас еиԥш реимадарақәа еиҳагьы рҵакы ӷәӷәахоит. Акраҵанакуеит ҳҳәынҭқаррақәа асоциал-економикатә хырхарҭаҟны русеицура иацырҵалар", - иҳәеит Вольвач.
Аԥсны ахада Аслан Бжьаниеи Урыстәыла Аекономикатә ҿиара аминистр ихаҭыԥуаҩ Дмитри Вольвачи реиԥылара
© Sputnik / Томас Тхайцук
Аԥсны ахада Аслан Бжьаниа Донецктәи Жәлар Рреспубликеи Лугансктәи Жәлар Рреспубликеи рхьыԥшымрақәа шазхеиҵо азы аусԥҟақәа инапы рыҵаиҩит жәабран 25 рзы.
Ахаша хәажәкыра 9 рзы Аԥсни ДЖәР-и адипломатиатә еизыҟазаашьақәа рыбжьарҵеит.