Аԥсни ДЖәР-и адипломатиатә еизыҟазаашьақәа рыбжьарҵеит
20:27 09.03.2022 (ирҿыцуп: 10:43 10.03.2022)
© Sputnik / Сергей Батурин
/ Анапаҵаҩра
Хара имгакәа Аԥсни ДЖәР-и аиҩызареи аусеицуреи рзы аҳәынҭқаррабжьаратә еиқәшаҳаҭра рнапы аҵарҩраны иҟоуп.
АҞӘА, хәажәкыра 9 - Sputnik. Аԥсны Аҳәынҭқарреи Донецктәи Жәлар Рреспубликеи адипломатиатә еизыҟазаашьақәа рыбжьарҵеит анотақәа реимдарала хәажәкыра 9 рзы, абри атәы аанацҳауеит Аԥсны ААР асаит.
"Аԥсни Донецктәи Жәлар Рреспубликеи рыҩжәларык рыбжьара аиҩызареи аусеицуреи рырӷәӷәара иадгылоит, аҭынчреи азинеиҟарареи ирықәныҟәаны аизыҟазаашьақәа рыргылара ацхраара рҭахны, аҩҳәынҭқаррак рыжәларқәа зызҿлымҳау ахықәкқәа рзы аҭахрақәа ирықәныҟәаны, урҭ рхьыԥшымрақәеи, рсуверенитети, рҵакыратә акзаареи пату еицрықәҵаны, адунеи аҿы иазхаҵоу егьырҭ жәларбжьаратәи азин апринципқәеи аԥҟарақәеи, раԥхьаӡа иргыланы Еиду амилаҭқәа реиҿкаара Аԥҟаԥҵәеи, ирықәныҟәаны", - ҳәа ануп аусбарҭа адырраҭараҿы.
Иазгәаҭоуп, аҩтәылак аиҩызареи аусеицуреи рзы аҳәынҭқаррабжьаратә еиқәшаҳаҭра аиқәыршәара ишаҿу.
Аԥсны ААР апресс-маҵзура аацҳамҭаҿы иазгәаҭоуп, ареспублика Урыстәыла Украина абџьархыхразы имҩаԥнаго аус ишадгыло.
Аԥсны ахада Аслан Бжьаниа Донецктәи Жәлар Рреспубликеи Лунсктәи Жәлар Рреспубликеи рхьыԥшымра азхаҵаразы аусԥҟа инапы аҵаҩит жәабран 25 азы.
