АҞӘА, хәажәкыра 12 – Sputnik, Бадраҟ Аҩӡба. Аԥсны иахьаҵанакуа алхырҭатә ҭыԥқәа рҿы еилагарак азгәаҭам ҳәа иҳәеит Аҩнуҵҟатәи аусқәа рминистр Вальтер Быҭәба.
"Аԥсны Апарламент ахь алхрақәа рымҩаԥгара аиҿкааразы Аԥсны ААР хәажәкыра 11 ауха инаркны рнапынҵақәа ҷыдала имҩаԥыргоит. 900-ҩык рҟынӡа ҳусзуҩцәа алхырҭатә ҭыԥқәа 152 рҿы ахылаԥшра мҩаԥыргоит", - иҳәеит Быҭәба.
Уи адагьы амилициа аусзуҩцәа жәларбжьаратәи анаԥшыҩцәа рхылаԥшра мҩаԥыргоит.
"Аҩнуҵҟатәи аусқәа русбарҭақәа русзуҩцәа ирус хаданы иҟоуп алхырҭатә комиссиақәа ацхыраара рыҭара, ауаажәларратә зинеиҿкаара аилагара алмыршара", - иҳәеит иара.
Аҳҭнықалақь, АКХ ахыбра акәша-мыкәша ада џьаргьы атранспорт аныҟәара ԥкны иҟаӡам ҳәа азгәеиҭеит аминистр.
Хәажәкыра 11 рызтәи адыррала Аԥсны атәылауаҩшәҟәы рымоуп 152116-ҩык ауааԥсыра. Урҭ рҟынтәи зықәра намӡац 5012-ҩык ыҟоуп. Хәажәкыра 12 рзы 18 шықәса рхыҵит хәҩык.