АҞӘА, хәажәкыра 13 - Sputnik. Хәажәкыра 12 азы Аԥсны ауааԥсыра COVID -19 азы атестқәа арҭеит 70-ҩык, урҭ рахьтә 47-ҩык аҿкчымазара шрымаз аадырԥшит ҳәа аанацҳауеит ауааԥсыра акоронавирус рацәыхьчаразы аоперативтә штаб.
Гәдоуҭатәи араионтә хәшәтәырҭа хадаҿы акоронавирус зыхьуаз ҩыџьа рыԥсҭазаара иалҵит 74, 86 шықәса зхыҵуаз ахацәа.
Ари аамҭазы Гәдоуҭатәи араионтә хәшәтәырҭа хадаҿы ишьҭоуп 17-ҩык, рҭагылазаашьа бааԥсуп 3-ҩык, ибжьаратәуп 14-ҩык. Аҟәатәи аинфекциатә хәшәтәырҭаҿы ирхәшәтәуеит акоронавирус зцәа иалоу 26-ҩык, урҭ рахьтә 12-ҩык рҭагылазаашьа уадаҩуп. Очамчыра ирхәшәтәуеит ԥшьҩык, Гагратәи ахәшәтәырҭаҿы - 10-ҩык, урҭ рахьтә ҩџьа рҭагылазаашьа уадаҩуп. Тҟәарчалтәи ахәшәтәырҭаҿы ԥшьҩык ачымазыҩцәа шьҭоуп.