АҞӘА, хәажәкыра 26 – Sputnik. Асааҭ 8:00 рзы Аԥсны иахьаҵанакуа 17 алхырҭатә ҭыԥ рҟны ихацыркхеит Жәлар Реизарахь алхрақәа аҩбатәи ртур.
Абжьыҭаразы алхраҭә ҭыԥқәа аартын асааҭ 8:00 рзы, ихыркәшахоит 20:00 рзы. Аус рулоит 69 алхратә ҭыԥқәа.
Абжьыҭара инеиуа рхыԥхьаӡара иазԥҵәоу ыҟаӡам, азакәан инақәыршәаны бжьы заҵәык ала еиҳахаз акандидат даиааит ҳәа дыԥхьаӡоуп.
Аԥсны Жәлар Реизарахь алхрақәа мҩаԥысит хәажәкыра 12 рзы. 35 ҭыԥ рахь иқәгылан 123-ҩык акандидатцәа. Иахьазы адепутатцәа алхуп 17 алхырҭатә ҭыԥ рҿы, даҽа 17 ҭыԥ рҿы алхрақәа аҩбатәи ртур мҩаԥгахоит,18-тәи алхратә ҭыԥ хадаҿы - аиҭалхрақәа.