АҞӘА, мшаԥы 1 - Sputnik. Аԥсны аиҳабыра акриптовалиута арҳареи, уи азы амаининг маругақәа атәыла алагалареи рзы аԥкрақәа рыҿҳәара инахеит ԥхынҷкәын 31 2022 шықәсанӡа.
Ари азы Аусԥҟа кьыԥхьуп Аԥсны Аминистрцәа реилазаара асаит аҟны.
Уи аԥхьа Аминистрцәа реилазаара Аппарат ахь инашьҭын амаининг амҩаԥгара азин аҟамҵара аҿҳәара иацызҵо азинтә актқәа рыпроект.
Аԥсны аминистрцәа реилазаара ақәҵарала аԥкрақәа 2020 шықәса ԥхынҷкәын 8 инаркны 2021 шықәса хәажәкыра 31 рҟынӡа аус руан. Акриптовалиута арҳаразы аусурақәа ирҿагыланы ауснагӡатәқәа мҩаԥысуеит 2020 шықәса аахыс афымцатә ҳақәа реидара ахьанҭахареи афымцамч адефицити инарыдҳәаланы.