АҞӘА, мшаԥы 7- Sputnik. Атәыла ахада Аслан Бжьаниа Аԥсны Жәлар Реизара абыжьбатәи ааԥхьара раԥхьатәи реилатәараз Аусԥҟа инапы аҵеиҩит. Абри атәы аанацҳауеит ахада ипресс-маҵзура.
Ахада Иусԥҟеи Аԥсны Аконституциа 41 ахәҭаҷи инарықәыршәаны Жәлар Реизара абыжьбатәи ааԥхьара раԥхьатәи реилатәара мҩаԥгахоит мшаԥы 12 асааҭ 12:00 рзы.
Аԥсны Жәлар Реизарахь алхрақәа мҩаԥысит хәажәкыра 12 азы, усҟан иалхын 17-ҩык адепутатцәа, 17 алхырҭатә ҭыԥ рҿы алхрақәа аҩбатәи ртур мҩаԥган хәажәкыра 26 азы.
Алхрақәа рылҵшәақәа рыла, абжьыҭара шьақәгылеит алхратә ҭыԥқәа 16 рҟны, Алашарбагатәи аабатәи алхратә ҭыԥ хадаҿы аиҭалхрақәа мҩаԥгахоит иқәгылаз акандидатцәа алхрақәа аҩбатәи ртур аҟны абжьқәа еиҟараны иахьроуз иахҟьаны.
Иара убас лаҵарамза 14 азы Гәдоуҭатәи ақалақьтә 18-тәи алхырҭатә ҭыԥ аҟны ҿыц аиҭалхрақәа мҩаԥгахоит, иқәгылаз акандидатцәа иахәҭаз абыжьқәа рхыԥхьаӡара ахьырмоуз иахҟьаны.