АҞӘА, мшаԥы 11 - Sputnik. Аԥсны Адәныҟатәи аусқәа рминистрраҿы иҟоу Ауаажәларратә хеилак аилатәара мҩаԥгахоит 2022 шықәса лаҵарамзазы ҳәа аанацҳауеит аусбарҭа апресс-маҵзура.
Уажәы Ахеилак аилазаара шьақәдыргылоит, аиҿцәажәарақәа мҩаԥыргоит.
Ахеилак иалахәхоит адәныҟа политикатә експертцәа, аҳәынҭқарратә усзуҩцәа, 1992-1993 шықәсазтәи Аџьынџьтәылатә еибашьар алахәылацәа, жәларбжьаратәи ажурналистцәа.
"Аԥсны жәлар аӡәк иеиԥш ихьыԥшым Аԥсны аҳәынҭқарра аргылареи арӷәӷәареи рҭахны жәларбжьаратәи аренаҟны аинтересқәа цәырыргоит. Аҳәынҭқарра адәныҟаполитикатә хырхарҭа ажәлар еиднакыло иҟазароуп", - аҳәоит Аԥсны ААР аҳәамҭа.
Аусбарҭаҿы иазгәарҭеит адәныҟаполитикатә хырхарҭа астратегиеи атактикеи аус рыдуыларазы ауаажәларратә еилацәажәарақәа хра рыманы ишыҟоу.