АҞӘА, мшаԥы 13 – Sputnik, Асмаҭ Ҵәыџьԥҳа. Аԥсны Аҳәынҭқарра ахада Аслан Бжьаниеи Аԥсны аҵареи абызшәатә политикеи рминистр Инал Габлиеи В. Г. Шухов ихьӡ зху Белгородтәи аҳәынҭқарратә технологиатә университет аректор Сергеи Глаголеви аиԥылара мҩаԥыргеит мшаԥы 13 азы.
Габлиа Глаголев ҭабуп ҳәа иеиҳәеит Аԥсны аҵареи абызшәатә политикеи рминистрра адгылара ахьеиҭо ази ирыбжьоу аимадарази.
"Ҳастудентцәа хәышықәса аҵара рҵоит Белгородтәи ауниверситет аҿы, ибзиангьы ирҵоит. Рыбзырӡы ҳаҳауеит. Аргылаҩцәа, архитекторцәа, анџьнырцәа рзанааҭ аибашьра ашьҭахь актуалра аҵоуп. Ҳекономика шьҭызхша аҟазауаа рабиԥара ҿыц ҳҭахуп", - иҳәеит аминистр.
Белгородтәи аҳәынҭқарратә технологиатә университет аректор еиҭеиҳәеит сынтәа аҵараиурҭаҿы аинформациатә шәарҭадара афакультет аҿы аҵара шырҵо Аԥснытәи астудентцәа.
"Сгәы иаанагоит аинформатизациа еиҳа-еиҳа ирылаҵәоит ҳәа, избанзар иахьа иарада иуадаҩуп. Ҳаигәырӷьоит Аԥснынтәи аҿар ахьнеиуа. Ҳгәыӷуеит сынтәагьы иҳазнеип ҳәа. 45 биуџьеттә ҭыԥ хиоуп. Иазҳархио аҟазауаа ара рҭыԥ шылырхуа агәра аагоит", - иҳәеит иара.
Глаголев иазгәеиҭеит аҵыхәтәантәи аамҭазы Аԥснытәи ашколхәыҷқәа разыҟаҵара ахаҭабзиара шышьҭыҵыз. Иара игәаанагарала, ари аҭыԥантәи арҵаҩцәа рыҩаӡара ашьҭыҵра иадҳәалоуп.
"Шәоушьҭымҭацәа ирылшоит уадаҩрада ҳҵаратә программақәа рхысра. Иҟоуп ибзиаӡаны уи зылшо. Аҵараҵара рҭахуп, ԥхьаҟагьы аолимпиадатә усеицура ҳамазар ҳҭахуп, ахәыҷқәа урыстәылатәи аҵарадырра иашьцыларц", - иҳәеит аиҿкаареи абитуриентцәа рыдкылареи рзы аинститут адиректор Сергеи Булгаков.
Инал Габлиа иҳәеит 2021 шықәса раахыс Урыстәылатәи аҵараиурҭақәа ирҭалар зҭаху Аԥснытәи абитуриентцәа апсихологиатә тестқәа ишырхысуа, рдырра, рҟазара, рылшара аилкааразы.
"Иалырхыз азанааҭ ахьынӡарнаало еилызкаауа аҿар ҵараҵара ишәызнеир ҳҭахуп", - иҳәеит иара.
Аиԥылара ахыркәшамҭаз аҳамҭақәа еимырдеит. Инал Габлиа асасцәа ириҭеит Аԥсны иазку ашәҟәқәеи афотожурналқәеи, Самсон Ҷанба исахьа зну араӡны медал.
Аԥснытәи аминистр иаҭәашьан амедал " Владимир Шухов ихьӡ зху Белгородтәи аҳәынҭқарратә техникатә университет аҿаԥхьа алшамҭақәа рзы".
Белгородтәи аҳәынҭқарратә технологиатә университет ахаҭарнакцәа идикылеит Аслан Бжьаниагьы.
Аиԥылараҟны ирылацәажәеит аҵараиуреи азанааҭалхратә усуреи русхк аҟны аусеицура азҵаарақәа ҳәа аанацҳауеит ахада ипресс-маҵзура.