АҞӘА, мшаԥы 27 - Sputnik. Аԥсны Адәныҟатәи аусқәа рминистр Донбасс хатәгәаԥхарала еибашьуа аԥсуаа дырзааҭгылеит ажурналист Владимир Соловьев аканал "Соловьев.Live" аҿы даниҿцәажәоз.
"Иазгәасҭар сҭахуп қьырала укараинатәи амилаҭеилыхыҩцәа ишрыцеибашьуа ақырҭқәа. Дара активла аинформациатә политика мҩаԥыргоит, ароликқәа ҭыхны TikTok иҭарҵоит румҭақәа рзы", - иҳәеит Арӡынба.
Аминистр иҳәеит 1992-1993 шықәсқәа раантәи Аԥсны жәлар Рџьынџьтәылатә еибашьраан ақырҭқәа ирыдгыланы ишеибашьуаз аиҿкаара "УНА-УНСО"* ("Украинатәи Амилаҭтә Ассамблеиа — Украинатәи Жәлар рҽыхьчара", - аред) алахәылацәа.
"Усҟан ақырҭуа еиҿкаарақәагьы реиҳарак злашьақәгылаз абандитцәеи амилаҭеилыхыҩцәеи рыла акәын. Урҭ аԥсуаа ҳадгьыл ҳахцаны аунитартә ҳәынҭқарра шьақәдыргылар рҭахын. Уи аибашьарагьы ҳара ҳзы иԥшьан, иахьа Донбасс ицо аибашьра азы ишыԥшьоу еиԥш", - иҳәеит аминистр.
Арӡынба иҳәеит, хатәгәаԥхарала Донбасс еибашьуа аԥсуаа аиашара аус рлагала шалоу.