АҞӘА, мшаԥы 28 – Sputnik. УАМ рҟынтәи зых иақәиҭтәу Херсонтәи аобласт лаҵара 1 инаркны амааҭтә зонахь ииагахоит ҳәа аанацҳауеит РИА Новости, арегион арра-граждантә напхгара ахантәаҩы ихаҭыԥуаҩ, Херсонтәи аобласт ахьчараз Аилак "Аҭынчреи азинеиҿкаареи рзы" анапхгаҩы Кирилл Стремоусов иажәақәа шьаҭас иҟаҵаны.
Иара иҳәеит ишазԥхьагәаҭоу ԥшьымз ирыҵанакуа аиҭакраамҭа. Ари аамҭала ахархәара рымазаауеит амааҭгьы агривнагьы.
"Абри ашьҭахь амааҭ ахь ииасуеит", - иҳәеит Стремоусов.
Иара убасгьы иҳәеит Херсонтәи аобласт Ҟрымҟа аӡы нанашьҭлоит Аҩада-Ҟрымтәи аканал ала, уажәшьҭарнахыс аӡәгьы иалиршом Ҟрым ӡыда аанхара ҳәа.
Херсонтәи аобласт Украина азыхынҳәра иҟамло усуп ҳәа иҳәеит Стремоусов. Убри аан Урыстәыла алаларазы референдумк мҩаԥгахом, аха Киевгьы ара аполитика азымҩаԥгом.
"Херсонтәи аобласт ҿиалоит, ишәҭыкакаҷуеит. Ара украинатәи анацизм аидеологиа аҭыԥ аиушам", - иҳәеит Стремоусов.
Херсонтәи аобласт Украина аладатәи акалҭ иаҵанакуеит, Ҟрым иаԥнуп. Аоперациа ҷыда амҩаԥгараан Херсонтәи аобласт зегьи Запорожтәи аобласт ахәҭеи урыстәылатәи ар рхылаԥшрахь ииасит.
Арегион аҿы еиҿкаауп арра-граждантә напхгара. Аус руеит урыстәылатәи ателеканалқәеи арадиои, Ҟрыми дареи ахәаахәҭратә еимадарақәа рыбжьарҵоит.