АҞӘА, лаҵара 2 - Sputnik. Еилкаахеит аспорт-ҽыхәмаррақәа ирызкны Кәтол имҩаԥгаз аицлабрақәа реихшьаала, абри атәы аанацҳауеит Аԥсны аҿари аспорти рзы Аҳәнҭеилакы.
Аицлабра хацаркын аспорт азҟазацәа аишьцәа Алхаси Гарики Палаванӡиаа ргәаларшәара аҳаҭыраз еиҿкааз, ҽыла аҵәыргыла ахыԥара дырбарала.
Кәтол имҩаԥысит аҽыхәмаррақәа реицлабра
© Sputnik / Томас Тхайцук
Акомандақәа Кәтоли Уарчеи рыбжьара аҵәеигәыдҵаҿы аиааира ргеит аԥшәмацәа 12:10 ҳәа.
Ҽыла ампыл асраҿы арҭ аҩкомандак рыбжьара аиааира ргеит Уарчаа. Дара аишьцәа Палаванӡиаа рыхьӡ зху еиҭаҵуа ахраҿа ранаршьеит аҿари аспорти рзы Аҳәнҭеилакы, иара убасгьы ирыҭан Очамчыра араион ахадара аҟынтәи аԥаратә ҳамҭа.
Аиндаҭлараҿы аӡбаҩс дыҟан аҽыспорт азҟаза Мазлоу Џьалоӷониа. Аӡбаҩ хадаси аицлабра зегьы аиҿкааҩыси далхын Џьон Табагәуа.
Аџьынџьтәылатә еибашьра Ду аҟны иҭахаз ргәалашәараз 2000 метра аҽқәа реиԥхныҩлараҿы актәи аҭыԥ агеит Џьон Табагәуа иҽыҩ "Наварро", иара Адунеизегьтәи аԥсуа-абаза жәлар рконгресс ахантәаҩы Мусса Екзакь иҟынтә аҳамҭа ианаршьеит.
Кәтол имҩаԥысит аҽыхәмаррақәа реицлабра
© Sputnik / Томас Тхайцук
Д. Ачба игәалашәараз 1800 метра иҩуаз рыбжьара актәи аҭыԥ иаԥсахеит Алан Табагәуа иҽы "Рыжик", иара ианашьан Очамчыра араион ахадара аҟынтәи аҳамҭа.
Аԥсны Аџьынџьтәылатә еибашьра 1992-193 шықәсқәа раан иҭахаз ргәалашәараз 1400 метра иҩуаз аҽқәа рыбжьара актәи аҭыԥ аанакылеит "Гордый", Ҭемыр Ахба иҽыҩ. Аҳамҭагь арҭеит аилахәыра А-Мобайл адиректор хада Борис Барцыц иҟынтәи.
Аҽырхәмаррақәа рҿы зҽалызкааз ахраҿақәеи, амедалқәеи арҽхәатә бӷьыцқәеи рырҭеит Аԥсны аҿари аспорти рзы Аҳәнҭеилакы.