АҞӘА, лаҵара 12 – Sputnik. Аԥсны ахада Аслан Бжьаниа аенергетикеи акриптавалиута амаининги рызҵаарақәа рзы аилацәажәара мҩаԥигеит ҳәа аанацҳауеит ахада Иусбарҭа апресс-маҵзура.
Ахада иазгәеиҭеит амаининг ҿагылараз имҩаԥгоу ауснагӡатәқәа шазымхо, ареспубликаҿ афымцамч ахархәара шыҳараку.
Аԥыза-министр Александр Анқәаби ахада Иусбарҭа анапхгаҩы Алхас Кәыҵниеи рнапы ианҵан акриптавалиута арҳара алзмыршараны иҟоу аусбарҭақәа рнапхгаҩцәа рҭакԥхықәра шьақәдыргыларц, иахәҭоу алеишәатә ӡбарақәа рыдыркыларц.
Аԥсны иахьаҵанакуа акриптовалиута арҳаразы аусура азин аанкылоуп 2020 шықәса ԥхынҷкәынмза аахыс афымцаҳақәа ахьажәуи ахьанҭара ахьырзышьҭымхуеи инарыдҳәаланы.
Азинхьчаратә усбарҭақәа закәаншьаҭада афымцацәаҳәақәа аҽрыԥшьреи акриптовалиута амаининг амҩаԥгареи ирҿагыланы аус руеит. Аҵыхәтәантәи аамҭазы акриптовалиута арҳаразы амаининг-ферма ду аарԥшын Тҟәарчал араион Бедиа ақыҭан 320 маиненг, зеиԥш мчхарала 400 киловатт.