АҞӘА, лаҵара 21 - Sputnik. Аԥсны ахада Аслан Бжьаниа Урыстәыла атәылахьчара аминистр Сергеи Шоигу иирамш идиныҳәалеит ҳәа аанацҳауеит ахада ипресс-маҵзура.
"Ари аҭагылазаашьа схы иархәаны даҽазныкгьы иҭабуп ҳәа шәасҳәар сҭахуп шәара хаҭала Аԥсны Аҳәынҭқарра Атәылахьчара аминистрреи Урыстәылатәи Афедерациа Атәылахьчара аминистрреи хра змоу русеицура, аҩтәылак реимадарақәа уҳәа рырӷәӷәаразы шәлагалазы", - ҳәа ануп адныҳәалараҿы.
Иара убас атәыла ахада иазгәеиҭеит Сергеи Шоигу Урыстәыла атәылахьчара, арбџьармчқәа рырӷәӷәараҿы илшамҭа дуқәа, изеиӷьеишьеит агәабзиара, Урыстәыла жәлар реизҳазыӷьара иазырхоу аиааира ҿыцқәа.