АҞӘА, лаҵара 25 - Sputnik. Лаҵарамза 24 рзы Ҭырқәтәыла, Қоџьаели ақалақь Қарҭеԥе аҽырҩырҭаҟны раԥхьаӡа акәны имҩаԥысит Кавказтәи аибашьра иалаӡыз ргәалашәара иазкыз "Аԥсны Ахраҿа" захьӡыз аҽырыҩра. Абри атәы аанацҳауеит Ҭырқәтәыла иҟоу Аԥсны ахаҭарнакра апресс-маҵзура.
Аҽырыҩра еицеиҿыркааит Қоџьаели ақалақь аҟны иаԥҵоу Аԥсуа культуратә центр аиҳабы, "Ахьӡ-Аԥша" аорден III аҩаӡара занашьоу Ҳасан Қардиа, Қоџьаели ақалақь аиҳабы Ҭаҳир Биуиқақьин, Ҭырқәтәылатәи аҽтәы клуб аиҳабы Ҭунсер Бганба, иара убас Ҭырқәтәыла ақыҭанхамҩа аминистрра.
Аиԥхныҩлара абжьаӡара 1900 метра ыҟан. Актәи аҭыԥ азы аԥхьахә иартәеит – 77 000 аҭырқәа лир, аҩбатәи аҭыԥ – 30 800, ахԥатәи аҭыԥ - 15 400.
Аҽырыҩра алҵшәақәа рыла, актәи аҭыԥ ааникылеит 18 шықәса зхыҵуа аҽыбӷаҟаза Гиоркан Озчелик.
Аԥсны ахьӡала аҽырыҩра аиҿкаара ауадаҩрақәа ацын, уи Ҭырқәтәыла иахьазханамҵац азы, аха уеизгьы уи аиҿкаара алыршахеит ҳәа азгәеиҭеит Ҭырқәтәылатәи Ареспубликаҿы иҟоу Аԥсны азинмчнагӡа змоу ахаҭарнак Ибраҳим Аҩӡба.
Ҭырқәтәыла аҽырыҩратә лига аҳәаақәа ирҭагӡаны Амҳаџьырқәа ргәалашәара иазку аиԥхныҩлара "Аԥсназы Ахраҿа" мҩаԥыслоит есышықәса лаҵара 24 рзы.