АҞӘА, лаҵара 27 - Sputnik. Аԥсуа интеллигенциа атәыла ахада Аслан Бжьаниеи аԥыза-министр Александр Анқәаби рахь ааԥхьара ҟарҵеит Аҟәатәи апантеон ахьчара еиҿыркаарц ҳәа аанацҳауеит "Аԥсныпресс".
Лаҵарамза алагамҭаз арбгаҩцәа апантеон аҿы абаҟақәа ԥшьба дырҳәит. Амемориалтә ҵакыра ишақәнаго ахылаԥшра амазарц азы аҵарауаа иҟаҵатәу азгәаҭаны ажәалагалақәа ҟарҵеит.
Раԥхьа иргыланы апантеон аҳәынҭқарратә статус амазароуп, иара аныҟәгараз ахарџьқәа, ареспубликатә биуџьет аҟынтәи иоужьлатәуп. Иара убасгьы апантеон иакәыршоу аанда ҟаҵаны иҳәазо адгьылқәа рӷәӷәатәуп. Уи ашьҭахь Аԥсны ААР амчхарала ахьчаратә ҭыԥ аарттәуп. Апантеон атуристцәа зҭаауа акультуратә ҭыԥқәа ирыҵарктәуп.
"Аиааира Амш аламҭалаз аҭыԥ змаз ахҭыс цәыԥҽыгароуп. Зегьы ргәы иалсит. Азинхьчаратә усбарҭақәа иахьагьы уи ҟазҵаз дшьақәыдмыргылацт", - аҳәоит аинститут адиректор Арда Ашәба дзыԥхьаз анашьҭымҭа атекст.
Ашәҟәы апроект рыдыркылеит риашарақәак алагалан, официалла атәыла ахадеи аԥыза-министри ирзынашьҭызарц.
Аилацәажәара иалахәын Апарламент аиҳабы Лаша Ашәба, Акультура аминистр Даур Ақаҩба, адепутатцәа, Аҵареи абызшәатә политикеи рзы аминистр ихаҭыԥуаҩ Ада Кәарҷелиаԥҳа, Ауаажәларратә палата амаӡаныҟәгаҩ Гули Кьычба, Ажурналистцәа реидгыла ахантәаҩы Руслан Ҳашыг, Ацәыргақәҵатә зал хада адиректор Ельвира Арсалиаԥҳа, Абыргцәа Рхеилак ахантәаҩы Аполлон Думаа, Аҟәа ақалақь ААР аиҳабы ихаҭыԥуаҩ Нугзар Чычба, аҵарауаа, ауаажәларратәи аполитикатәи усзуҩцәа, ажурналистцәа, Аслан Оҭырба иҭаацәа рхаҭарнакцәа.
Иқәгылоз иҟалаз иақәыӡбон, иазгәарҭон ари аҭыԥ иԥшьоу ҭыԥны ишыҟоу, уа анышә иамадоу ауаа аԥсуа ҳәынҭқарреи акультуреи рахь рлагала шдуу.
Аҟәатәи ашьхаҿы атәыла иналукааша ауаажәларратә усзуҩцәеи ашәҟәыҩҩцәеи рпантеон аартын 1960 шықәсазы. Ара анышә иамадоуп еицырдыруа ареспублика ауааԥсыра: ашәҟәыҩҩцәа, аҵарауаа, ауаажәларратәи аполитикатәи усзуҩцәа.