АҞӘА, рашәара 9 – Sputnik. Урыстәыла Амш аҳаҭыр азы еиҿкаау ацәыргақәҵа "Аурыс сахьаҭыхыҩцәа Аԥсны" аатит Аҟәа рашәара 9 рзы Ацәыргақәҵатә зал хадаҿы.
Ацәыргақәҵатә зал хада аиҳабы Ельвира Арсалиаԥҳа лажәақәа рыла, аҭааҩцәа асахьа ԥшӡақәа рыхәаԥшра адагьы, урҭ ҭырҵаар рылшоит. Лара ишылҳәаз ала, урҭ асахьақәа рҿы асахьаҭыхыҩцәа иаадырԥшуаз иабзоураны еилукаар ҟалоит еиуеиԥшым аҭоурыхтә аамҭақәа рзы Аԥсны имҩаԥысуаз ахҭысқәа.
"Дара (аурыс сахьаҭыхыҩцза - азгә.) активла аԥсҭазаара аганқәа ирылахәын, асахьаҭыхратә ҟазара арҿиареи Аҟәатәи асахьаҭыхратә ҵараиурҭа аиҿкаареи рџьабаа адуп. Убри азы арҭ ауаа русумҭақәа зегьы аинтерес зҵоу аҭоурыхтәи акультурологиатәи ҵакы рымоуп", - лҳәеит Ацәыргақәҵатә зал хада аиҳабы Ельвира Арсалиаԥҳа.
"Аурыс сахьаҭыхыҩцәа Аԥсны" ацәыргақәҵаҟны иаарԥшхоит XX ашәышықәса иатәу аурыс сахьаҭыхыҩцәа Аԥсны иазыркхьаз 45 усумҭа, урҭ ҭызхқәаз рыбжьара иҟоуп еицырдыруа аҟазацәа Контарев, Сегаль, Брендель, Бубнова, Котлиаров, Писарчук.
"Даара аҵак ду амоуп иахьа иуадаҩу аамҭақәа рзы Аԥсны иахьыргәалашәоә, бзиа иахьырбо аурыс культура", - иҳәеит Урыстәыла аусқәа аамҭала Аԥсны знапы иану Максим Литвинов.
Ельвира Арсалиаԥҳа лажәақәа рыла, ацәыргақәҵа аҳәаақәа ирҭагӡаны еиҿкаахоит агәаанагареибыҳәарақәеи аекскурсиақәеи. Ацәыргақәҵа аартызаауеит рашәарамза 17 рҟынӡа.