АҞӘА, рашәара 13 - Sputnik. Аԥсны Аҳәынҭқарратә ҳазалхратә еилакы атәылахь акриптовалиута амаининг азы аппаратқәа изакәанымкәа ралагалара аԥдырҟәҟәаит, абри атәы аанацҳауеит аусбарҭа апресс-маҵзура.
Амаининг азы амаругақәа жәбеи урҭ рышьақәгылагақәеи рбеит рашәара 11 рзы Аԥсны атәылауаҩ И. Чхьетиа иитәыз арҭмаҟи имашьына иҭаз акәалаԥқәеи ргәаҭараан.
Уи аҽныҵәҟьа Аԥсны атәылауаҩ С.Кондакчиан зыԥсҟы икыз автомашьынаҿы ирбеит иагьимырхит 8 хеш-платак (амаининг-маругақәа рзы ашьақәгылагақәа - аред.азгә.).
Ирԥшааз амаругақәеи ашьақәгылагақәеи аҳазалхратә ҭыԥ "Ԥсоу" аусзуҩцәа ирымырхит. Аматериалқәа Аԥсны Аҳәынҭқарратә ҳазалхратә еилакы ашьаусԥшааратә ҟәшахьы ирырҭеит.
Аԥсны Аминистрцәа реилазаара ҳазҭоу ашықәс нҵәаанӡа амаинингтә фермақәа афымцамч рхы архәарази, иара убас акриптовалиута арҳаразы амаругақәа атәылахь ралагаларази аԥкрақәа ирыцырҵеит.