АҞӘА, рашәара 14 – Sputnik. Аԥснытәи аҳәынқарратә университет имҩаԥнагоит анапхгаҩцәа ҿарацәа реицлабра "Аԥсны агәадура", абри атәы аанацҳауеит аҵараиурҭа асаит.
Аицлабра аҽалархәразы арзаҳалқәа рыдыркылоит ԥхынгәы 1 инаркны 7 нӡа.
Алхрақәа мҩаԥгахоит еиуеиԥшым ахәҭақәа рыла: ԥхынгәы 18 рзы- авидео-аессе аҿцәажәара, ԥхынгәы 25 рзы- аԥышәахыжьра, нанҳәа 1- аицлабра афинали алахәылацәа рпроектқәа аӡыргареи.
"Аԥсны агәадура" - анапхгараҭаҿы аус зур зылшо аҿар реицлаброуп, уи хықәкыс иамоуп Аԥсны Аҳәынҭқарраҿы абаҩхатәра злоу аҿар раарԥшреи рыдгылареи. Аиҿкааҩцәа ргәы излаҭаркыз ала, ари аицлабра анапхгаҩцәа ҿарацәа рзы социалтә цхыраагӡахоит, шьаҭасгьы иазыҟалоит ламыс злоу, зус здыруа абиԥара ҿа рыбзоурала аҳәынҭқарратә аппарат арҿыцра.
Ҳтәылаҟны раԥхьаӡа аицлабра "Аԥсны агәадура" мҩаԥган 2020 шықәсазы. Ауаа рыбжьыҭареи аиндаҭларатә комиссиа рыхәшьареи неилаҵаны актәи аҭыԥ ааникылеит Саид Беиа, аҩбатәи – Асҭамыр Қәҭарба, ахԥатәи – Александр Ачба, аԥшьбатәи – Алмахсиҭ Осиа, ахәбатәи – Абзагә Ҵәыџьба.