АҞӘА, рашәара 14 – Sputnik. Аԥсны ахада Аслан Бжьаниа абылтәы ахәԥса аиҿкааразы аилацәажәара мҩаԥигеит, абри атәы аанацҳауеит атәыла ахада ипресс-маҵзура.
Аиԥылара аҳәаақәа ирҭагӡаны иалацәажәеит абылтәы ахәԥсақәа рҽеиҭакра зыхҟьо, урҭ рышьақәыргыларазы иарбан шьаҿақәоу иҟаҵатәу.
Аԥыза-министр ихаҭыԥуаҩ, аекономика аминистр Кристина Озган лажәақәа рыла, абылтәы ахә аизҳара ахҟьеит Урыстәыла ашәахтәаразы азакәанԥҵара аиҭакрақәа ахьалагалоу, иара убас Украина имҩаԥысуа ахҭысқәа.
"Иҟан ус еиԥш аамҭакы аинформациа анҳамаз абылтәы шә-мааҭк иаԥсахоит ҳәа. Мшаԥымзазы уи аҭагылазаашьа ҳалҵеит. Абылтәы ҭиира иалахәу аилакқәа ари аус даараӡа иацхрааит, ахәԥсақәа иахьынӡалшоз иааныркалеит", - лҳәеит Озган.
Озган илҳәеит, Урыстәыла аҭагылазаашьа аҽеиҭанакуеит, аха Аԥсны ахәқәа уи иашьҭагыланы аиҭакра азалыршахом, избан акәзар аблытәы еизакны иаархәоит, ирымҭииц аалыҵ ахәԥса ашьақәыргылараан анырра ҟанаҵоит.
Иара убас аминистр иазгәалҭеит, ари азҵаара аӡбразы урыстәылатәи рколлегацәеи дареи аиҿцәажәарақәа шымҩаԥырго.
Аилатәра алҵшәақәа рыла Аслан Бжьаниа аекономика аминистрра рнапы ианиҵеит урыстәылатәи рколлегацәеи дареи ирыӡбырц Аԥсны ахархәарахь иаиурц аҩынтәтәи аӡа, ажәалагала ҟаиҵеит иаарласны атреидерцәа рыԥшаарц.