АҞӘА, рашәара 14 – Sputnik. Очамчыреи, Гали, Тҟәарчали араионқәа рхәшәтәырҭақәа рмедусзуҩцәа COVID-19 аламырҵәара иазааԥсоз аҳамҭақәа ранаршьеит, абри атәы аанацҳауеит Аԥсны агәабзиарахьчара аминистрра апресс-маҵзура.
"Акоронавирустә ҿкы апандемиа ҳаԥсҭазаара аиҭакра дуқәа аланагалеит. Иааҳхымхӡакәа асабрадақәа ныҟәаагон, еиуеиԥшым аԥкрақәа ҳрықәнаҟәон. Иуадаҩын. Шәара аҳақьымцәа ҳтәылауаа рыԥсеиқәырхаразы ишәылшозгьы ишәылымшозгьы ҟашәҵон. Шәааԥсаразы иҭабуп", - иҳәеит Аԥсны Агәабзиарахьчара аминистр Едуард Быҭәба.
Гал араион "COVID-19 аламырҵәара рџьабаазы" амедалқәа ранашьан 17-ҩык амедусзуҩцәа, Очамчыра - 20-ҩык. Галнтәи ԥшьҩык аҳақьымцәеи Очамчырантәи хәҩыки иранашьан Аԥсны ахада Аслан Бжьаниа иҟынтәи аҳаҭыртә шәҟәқәа, иара убас Аԥсны Агәабзиарахьчара аминистр ихьӡала аҳаҭыртә шәҟәқәа ранашьан Гал араион аҟазауаа 46-ҩык, Очамчыра-40-ҩык.
Иара убас амедусзуҩцәа аҳамҭақәа ранашьара мҩаԥган Тҟәарчал. Уаҟа амедалқәа ранаршьеит 40-ҩык амедусзуҩцәа, агәабзиарахьчара аминистр ихьӡаала аҳаҭыртә шәҟәқәа иаԥсахеит 45-ҩык.
Ааигәанӡа Аԥсны араионтә хәшәтәырҭақәа рыҟны иаартын аковид ҟәшақәа. Ари аамҭа иалагӡаны Тҟәарчалтәи араионтә хәшәтәырҭаҟны рҽырхәшәтәит 780-ҩык, Очамчыратәи ахәшәтәырҭаҟны- 843-ҩык.
Аԥсны аҿкчымазара аҭагылазаашьа ҭышәантәалеит, ачымазара хҽуа иалагеит, иалагалаз аԥкрақәа реиҳарак аԥыхуп, COVID-19 зыдбалоу ачымазцәа рзы аҟәша аартуп Гәдоуҭатәи ахәшәтәырҭаҟны.