АҞӘА, рашәара 22 - Sputnik. Апарламент аҿы имҩаԥысит инарҭбаау аекономикатә политикеи, аиҭакрақәеи, аинформациатә технологиақәеи рзы Аилак аилатәара, абылтәы ахәԥсақәа рҭышәныртәалара иазкны. Абри атәы аанацҳауеит Жәлар Реизара асаит.
Аилатәарахь инаԥхьаз "Аԥсныбылтәы" адиректор хада Рамаз Џьопуеи уи ихаҭыԥуаҩ Витали Корсантиеи адепутатцәа рызҵаарақәа рҭак ҟарҵеит. Ирҳәеит ахәқәа рышьҭыҵра зыхҟьо, ахәԥса шеиҿкаау, аҭагылазаашьа аиӷьтәразы ргәы иаанаго.
Хазы иазааҭгылан ахәԥсеиҿкаара ахылаԥшра аҭареи азакәанԥҵара аиҭакрақәа ралагалареи.
Адепутатцәа аамҭа мгакәа ари азҵаара аҭышәныртәалараз, аекономика аминистр Кристина Озган лԥылара шаҭаху атәы рҳәеит.
Аилак ахантәаҩы Резо Занҭариа имҩаԥигаз аилатәара иалахәын: Апарламент аиҳабы Лаша Ашәба, уи ихаҭыԥуаа Фазлибеи Аҩӡба, Асҭамыр Аршба, Ашоҭ Миносиан, адепутатцәа.
Абылтәыҭирҭатә џьармыкьаҿ иҟоу аҭагылазаашьа аилкааразы уаанӡа адепутатцәа уи азы иахәҭоу аилазаарақәа азыҳәақәа рзынарышьҭхьан.