АҞӘА, рашәара 23 – Sputnik. Шоҭа Ҷкадуа ирҿиамҭала акомедиа аԥхьарбара ҟалоит Аԥсуа драматә театр аҿы рашәара 29, 30 асааҭ 19:00 рзы ҳәа арадио Sputnik иазеиҭеиҳәеит атеатр адиректор хада Алхас Ҷолокәуа.
"Шоҭа Ҷкадуа ипиесақәа изныкымкәа Аԥсуа театр асценаҿ иқәдыргылахьеит. Иара иналукааша аԥсуа драматургуп. Ирҿиамҭақәа рактуалра рцәыӡуам. Аспектакль "Ҳауа идагәада?" уаанӡагьы иқәдыргылахьан, усҟангьы режиссиорс иҟаз Мадина Аргәынԥҳа лакәын. Уажәы ари апиеса дазыхынҳәырц лыӡбеит, аха ҽа знеишьак ала", - иҳәеит иара.
Атеатр адиректор хада агәра ганы дыҟоуп ақәыргыламҭа ахәаԥшцәа рзы аинтерес ду шаҵало, агәахәара шырнаҭо.
"Апиеса цәаҳәа ҟаԥшьны иагәылсуа атема еснагь актуалра амоуп. Уи аиҳабацәеи аҿари реизыҟазаашьоуп. Уи адагьы аспектакль аҿы иуԥылоит аԥсҭазаараҿ аҭыԥ змоу аҟазшьақәа – амҵақьақьара, ҩ-цәак ахарԥара. Иҟоуп урҭ ирҿагыло ауаагьы", - иҳәоит Алхас Чолокәуа.
Шоҭа Ҷкадуа дравторуп ашәҟәқәа: "Асатиратә пиесақәа" (1958), "Ашкәакәеи аиқәаҵәеи" (1961), "Асатиреи аиумори" (1964), "Ашьхыц" (1965), "Ауаҩи иҭыԥи" (1972).
Иара инапы иҵыҵит апиесақәа, аводевильқәа, аповестқәа, ажәабжьқәа, афельетонқәа – ауаа рыхшыҩ аҿы инханы иҟоу ажәытәрақәа аҿаԥызҽуа. Аповестқәа "Аԥҳәыс лас" (1960), "Аччара баҩ алоума?!" (1961) уҳәа реиԥш Шоҭа Ҷкадуа иҩхьан асатиратә комедиақәа "Ҳауа идагәада?" (1964) "Жьулиеи Мажьулиеи". Шоҭа Ҷкадуа ипиесақәа изныкымкәа Аԥсуа театр асценаҿ иқәдыргылахьеит.