АҞӘА, Рашәара 30 – Sputnik. Акыраамҭа зҭыԥ аҿы игылаз аидарамҩангага-ӷба арыц аманы Бердианскынтәи идәықәлеит, абри азы адырра ҟаиҵеит Запарожие арра-граждантә хадара аиҳабы Евгени Балицки.
"Аҩыза-тәылақәа рахь амҩа иқәҵоуп быжьнызқь тонна арыц", - иҩуеит иара Telegram-канал аҿы.
Балицки иажәақәа рыла, аидарамҩангага-ӷба ашәарҭадара еиҿыркаауеит Амшынеиқәатә флот Новороссиисктәи арра-мшынтә база аӷбақәеи ашхәақәеи. Уаанӡа афлот анџьнырцәа Бердиансктәи абаӷәаза аҭаларҭаҟны иҵаз аминақәа еиҵырхит. Уажәы абаӷәазеи аҵакыреи шәарҭам.
"Бердианск қалақьны иршьо иалагеит абаӷәаза абзоурала. Ари анаплакы аусура аекономикатә ҵак ду аман. Зых иақәиҭу Бердианск азы- абаӷәаза аусура аиҭахацыркра аҵакы дууп", - иҳәеит Запорожие ахада.
Аоперациа ҷыда амҩаԥгараан урыстәылатәи аруаа Херсонтәи аобласти Украина аладахьы иҟоу Запорожиетәи аобласт Азов иаԥну ахәҭеи рнапахьы иааргеит. Арегионқәа рҿы арра-граждантә напхгарақәа аԥҵоуп, урыстәылатәи ателеканалқәеи арадиостанциақәеи ддырбо иалагеит, Ҟрыми дареи рыбжьара ахәаахәҭратә еимадарақәа реиҭашьақәыргылара иаҿуп. Зых иақәиҭтәу аобластқәа Урыстәылатәи Афедерациа иалаларц шырҭаху азы аҳәамҭақәа ҟарҵахьеит.