АҞӘА, ԥхынгәы 7 – Sputnik. II Жәларбжьаратәи аоператә фестиваль ахыркәшаратә концерт мҩаԥган Пицундатәи ауахәамаҿы, абри атәы Sputnik иазеиҭалҳәеит уи адиректор Гәында Агрба.
"Аконцерт ахәаԥшцәа рыла ибеиан, амузыкантцәа гәахәарыла ирыдыркылон, агәалаҟазаара бзиа рыман. Аԥсшьаҩцәа рацәан. Иахьа иқәгылон Аԥсны акамертә оркестр, аурӷан аирҳәон Лука Гаделиа, ашәақәа нарыгӡон Аҳәынҭқарратә филармониа ахкы нагӡаҩцәа", - лҳәеит Агрба.
Афестиваль аартын Аԥсуа драматә театр аҿы, ԥхынгәы 6 рзы имҩаԥган "Piano Duo" аконцерт, акультуратә уснаӡатә хыркәшан Пицундатәи ауахәамаҿы.
II Жәларбжьаратәи аоператә фестиваль иалахәын Аԥсны ахортә капелла, Аԥсны акамертә оркестр, Адыгеиатәи аҳәынҭқарратә симфониатә оркестр, Чаиковски ихьӡ зху Москватәи аҳәынҭқарратә консерваториа Акамертә хор.
Аоператә ариақәа нарыгӡон: Нинель Бжьаниаԥҳа, Гәлиза Аҩӡԥҳа, Нана Черқьезиаԥҳа, Алхас Ферзба, Асҭамыр Кәыҵниа, Кристина Ешԥҳа, Сирануш Гаспариан, Атеатр ду аоператә труппа асолист Бехзод Давронов. Аконцерт далахәуп ауарӷанарҳәаҩы Лука Гаделиа.