АҞӘА, ԥхынгәы 14 - Sputnik. Аминистрцәа реилазаараҿы имҩаԥысыз аусутә еилацәажәараҿы аԥыза-министр Александр Анқәаби акультура аминистр Даур Ақаҩбеи иалацәажәеит Аԥсны акультуратә обиектқәа рреставрациеи реиҭашьақәыргылареи азҵаарақәа. Абри атәы аанацҳауеит Аԥсны Аминистрцәа реилазаара асаит.
Даур Ақаҩба еиҭеиҳәеит ацәгьоуцәа Аҟәатәи апантеон аҿы ааха зырҭаз абаҟақәа реиҭашьақәыргыларазы иаҭаху аусурақәа рхарџьынҵа шеиқәыршәоу. Уаанӡа, лаҵарамзазы ацәгьоуцәа Аԥсны аҳәынҭқарратәи ауаажәларратәи усзуҩцәа рбаҟақәа аԥхасҭа рырҭеит - иамхны ирӡеит аџьаз иалхыз абарелиефқәеи абиусти.
Александр Анқәаб дазҵааит Дәрыԥшьтәии Лыхнытәи ауахәамақәа рҿы аҭагылазаашьа зеиԥшроу. Даур Ақаҩба иажәақәа рыла, Дәрыԥшьтәи ауахәама апроект шьақәыргылоуп, Лыхнытәи ауахәамаҿы ахыб иаҭаху ахарџьгьы шьақәыргылоуп.
Даур Ақаҩба аԥыза-министр изеиҭеиҳәеит Аԥсуа ҳәынҭқарратә ашәаҳәареи акәашареи рансамбль ахыбра аиҭашьақәыргылара ахьынӡанеихьоу, иазгәеиҭеит атәыла аиҳабыра аԥара ззоунажьраны иҟоу Дырмит Гәлиеи Нестор Лакобеи рмузеиқәа рыпроект-харџьынҵатә документқәа разыҟаҵара ишаҿу.
Уи адагьы, аиԥылараан иалацәажәеит Аԥсны жәлар Рџьынџьтәылатә еибашьраан иҭахаз аибашьцәа ирызку абаҟа ҿыц Гәдоуҭа ашьақәыргылара иазку азҵаарақәеи Аԥсны Абираҟ амш иазку агәырӷьаратә усмҩаԥгатәқәа рыпрограммеи.