АҞӘА, ԥхынгәы 15 – Sputnik. Аԥсны ахада Аслан Бжьаниеи Башкортосҭан аԥыза-министр Андреи Назарови Уфатәи аматорҟаҵаратә наплакы иаҭааит.
Аԥснытәи аделегациа иддырбеит аверталиотқәа рыхәҭақәа рҭыжьразы ааглыхра-технологиатә центр аусура. Ари иахьазы еиҳа иҿыцу ааглыхроуп. Ацентр аҿы аус руеит 800-ҩык инарыцны аусзуҩцәа, 300 уасҭага рҟны.
"Уфатәи аматорҟаҵаратә наплакы аҭоурых ду змоу, акрызҵазку иуникалу наплакуп. Амашьынаҟаҵара аусхк аҿы аԥышәа ду амоуп", - асасцәа ирзеиҭеиҳәеит Назаров.
Иара иазгәеиҭеит анаплакаҿы аҿар аус шыруа, урҭ уфатәи аҵараиурҭақәа ишроушьҭымҭацәоу
Анаҩс аделегациа авиациарныҟәагақәа ахьԥыршәои авиациарныҟәага ахәҭақәа ахьеизыркуа ауасҭарҭақәа рахь инеит.
Бжьаниа ара иибаз ахә ҳаракны ишьеит.
"Аинтерес ду аҵоуп азауад абара, авиациатә рныҟәагақәа ахьыҭрыжьуа лабҿаба ахәаԥшра. Ааглыхратә уасҭарҭақәа санырҭаа ашьҭахь, сара аҽазныкгьы агәра згеит, Аԥсни Урыстәылеи ҳанеицу- уаҩ дшаҳзымиааиуа", - иҳәеит Аԥсны ахада.
Иара иажәақәа рыла Аԥсны азыхиоуп еиуеиԥшым аусхкқәа рҟны Башкортосҭан аус ацура.
Аслан Бжьаниа аекскурсиа ашьҭахь ҳамҭас ирҭеит азауад аҟны еидыркыло аҳаирплан Су-35 ақәҭых маҷ. Ахада уи иусурҭатә уадаҿ ишықәиргыло атәы иҳәеит.