АҞӘА, ԥхынгәы 21 - Sputnik. Урыстәыла анырҵәагатә авиациа украинатәи аҳаирплан Су-25 ДЖәР ажәҩанҵакыраҿ икарыжьит ҳәа аанацҳауеит Атәылахьчара аминистрраҟынтә.
Уи адагьы урыстәылатәи аҳауаҿагыларатә мчқәа иҭадырхеит украинатәи авертолиот Ми-8, аԥырҩы дызҭам ахархәагақәа 5, рыԥырра еиԥырҟьоуп зныкҟьара ихысуа аракетатә системақәа "Ураган" ахгәыцәқәа ааба Херсонстәии Харьковтәии аобластқәа рҿы.
Аусбарҭа адыррала, икылкааны ихысны иҭадырхеит 120-ҩык қырала аибашьцәа назлоу 600-ҩык амилаҭеилыхыҩцәа Одессатәи аобласт аҟны рыԥсшьарҭа ҭыԥ "Империа" аҿы.
Уи адагьы, Николаев иҭархан УАМ амилаҭеилыхыҩцәа 320-ҩык. Аоператив-тактикатә авиациеи аракетатә ари, артиллериеи уахыки-ҽнаки рыла ааха рырҭеит анапхгараҭаратә ҭыԥқәа жәба: Николаев игылаз 59-тәи амшыншьаҟатә бригада, Артемовск игылаз 14-тәи амеханизациа зызуу абригада, Краматорск иҟаз УАМ аштаб-квартира. Иқәыцҟьаауп аракета-артиллериатә бџьари аџьаԥҳани рышьҭаҵарҭақәа фба.
Ааха рыҭоуп зныкҟьара ихысуа аракетатә системақәа "Ураган" абатареиеи агаубицақәа "Акациа" абатареиеи Харьковтәи аобласт аҿы, зныкҟьара ихысуа аракетатә системақәа "Град" авзводқәа ааба, агаубицақәа Д-20 рартиллериатә взводқәа фба, Д-30 рартиллериатә взводқәа быжьба.
Урыстәыла Украина арратә операциа иалагеит жәабран 24 азы. Иара хықәкыс иамоуп Украина абџьархыхра, амилаҭеилыхцәа рықәгара, Донбасс ауааԥсыра киевтәи арежим аҟынтә реиқәырхара.