АҞӘА, нанҳәа 3 – Sputnik. Москва имҩаԥысит Аԥсни Урыстәылеи рсоциалтәии рекономикатәии зеиԥшҵакыра аиҿкаара азҵаарақәа рзы Апрограмма анагӡараз аусутә гәыԥ реилатәара. Абри атәы аанацҳауеит аԥыза-министр ихаҭыԥуаҩ, аекономика аминистр Кристина Озган аофициалтә лдаҟьа.
Аганқәа ахәаԥшит аинвистициатә, азинтә, ашәахтә, аҳазалхратә, агәабзиарахьчаратә усхкқәа рызҵаарақәа.
Аусутә гәыԥ ацхантәаҩцәа – Кристина Озган (аԥснытәи аган), Дмитри Вольвач (урыстәылатәи аган) ахәшьара ҳарак арҭеит аусбарҭақәа имҩаԥыргаз аусура, агәыӷра аадырԥшит иарбоу аҿҳәарақәа ирҭагӡаны ахықәкқәа нагӡахап ҳәа.
2021 - 2023 шықәсқәа рзы инагӡатәуп Аԥсни Урыстәылеи рзеиԥшҵакыра аиҿкаара Апрограмма, уа иарбоуп атәылауаҩра, ашәахттәии аҳазалхратәии ҭышәныртәалара, аинвистициақәа рыхьчара иазку ауснагӡатәқәа.
Адокумент иазыԥхьагәанаҭоит жәларбжьаратәи аиқәшаҳаҭрақәа, ареспублика азакәанԥҵаратә актқәа анап рыҵаҩреи рыдкылареи.
Аилатәара иалахәын Аԥснытәи аган ахь ала – Ашәахтәқәеи аизгақәеи рминистр Џьансыхә Нанба, Агәабзиарахьчара аминистр Едуард Быҭәба, Аҵареи абызшәатә политикеи рминистр Инал Габлиа, Асоциалтә еиҿкаареи адемографиатә политикеи рминистр Руслан Аџьба, ААР аминистр ихаҭыԥуаҩ Одиссеи Бигәаа, Аҳазалхратә еилакы ахантәаҩы актәи ихаҭыԥуаҩ Алиас Лабахәуа, афинансқәа, аиустициа, аҩныҵҟатәи аусқәа рминистррақәеи Амилаҭтә банки рхаҭарнакцәа, иара убасгьы Аԥсны ахада Иусбарҭа аҳәынҭқарра-зинтә усбарҭа аиҳабы Наҭела Ломиаԥҳа.
Аилацәажәара иалахәын Урыстәыла аиустициа, афинансқәа, афымцамч, аџьа, аҵара, аҭҵаарадырра, ахәаахәҭра рминистррақәа уҳәа аусбарҭақәа рхаҭарнакцәа.
Аԥсни Урыстәылеи рсоциалтәии рекономикатәии зеиԥшҵакыра аиҿкаара азҵаарақәа рзы Апрограмма шьақәырӷәӷәан абҵара 12, 2020 шықәсазы.