АҞӘА, нанҳәа 4 - Sputnik. Аԥсни Урыстәылеи аҳазалхра аусхк аҟны рзакәанԥҵарақәа реишьаршәалара иалацәажәеит, абри атәы арадио Sputnik иазеиҭеиҳәеит Аԥсны Аҳәынҭқарратә ҳазалхратә еилакы ахантәаҩы актәи ихаҭыԥуаҩ Алиас Лабахәуа.
Иара иажәақәа рыла аганқәа ф-пунктк ирзааҭгылеит. Акы – акыршықәса аусура аицазхаҵара – иаразнакы ирыдыркылеит. Егьырҭ макьаназ рылацәажәара иаҿуп. Изҵаара хаданы иҟоу Аԥсны Аҳәынҭқарреи Евразиатәи аекономикатә еидгылеи рҳазалхратә закәанԥҵара аишьаршәалароуп. Уи иаанаго аҳазалхратә закәан ҿыц адкылароуп. Азакәан апроект хиоуп. Аминистрцәа реилазаареи ахада Иусбарҭеи рҿы ианахәаԥшлак ашьҭахь ашәҟәқәа Апарламент ахь инарышьҭуеит.
Лабахәуа иажәақәа рыла. азакәан аишьаршәалара аҳәаа аидареи атауарқәеи рахыгара армариоит.
"Аҵакы аманы иҟоуп аҳазалхратә документқәагьы реицазхаҵара. Аха уигьы аҳазалхратә закәанеидкыла анҳадаҳкылалак ашьҭахь акәхоит. Ҳәарада, ари аҳәаа аидареи атауарқәеи рахыгара армариоит. Аԥсни Урыстәылеи рзакәанқәа еишьашәалахар, адәныҟаекономикатә усура алахәыла абри азакәанеидкыла инақәыршәаны имҩаԥигалоит. Аҳәаа иахырго аидареи атауари ашәҟәы рҭагалара арежим ырмариахоит", - иҳәеит иара.
Уаанӡа атәыла аиҳабыра ирыдыркылахьан атауартә номенклатураз ақәҵара, уи амчра аиуеит ажьырныҳәа 1 2023 шықәса инаркны. Иара ЕврАзЕСР ахеилак ишьақәнарӷәӷәаз адокумент иеиԥшуп.
"Азакәанқәа реишьаршәалара аамҭа-аамҭала имҩаԥаагоит. Уажәы аҳәаа иахырго атауарқәа зегьы жәахыԥхьаӡараны иҟоу акодқәа рыҭара ҳалагоит. Урыстәылагь абри аҩыза атауартә номенклатура аус ауеит", - иҳәеит иара.
Нанҳәа 3 азы Москва имҩаԥысит Аԥсни Урыстәылеи рсоциалтәии рекономикатәии зеиԥшҵакыра аиҿкаара азҵаарақәа рзы Апрограмма анагӡараз аусутә гәыԥ реилатәара.