ГӘДОУҬА, нанҳәа 15– Sputnik, Бадри Есиава. Аԥсны ахада Аслан Бжьаниа амедал "Уаԥстәыла Ахьӡ-аԥшазы" ианаршьеит.
Ари амедал ианашьоуп иԥсҭазаара даналҵ ашьҭахь Аԥсны раԥхьатәи ахада Владислав Арӡынба.
Амедал ранашьоуп Аԥсны Апарламент аиҳабы Лаша Ашәба, Атәылахьчара аминистр Владимир Ануа, ихаҭыԥуаҩ Беслан Ҵәыџьба, аспорт аусқәа рзы ахада иабжьгаҩ Ахра Ашәба, афонд "Иаҳхашҭуам" анапхгаҩы ихаҭыԥуаҩ Лиалиа Чамагәуаԥҳа.
Амедал "Уаԥстәыла Ахьӡ-аԥшазы" ранаршьоит ауааԥсыра рҭагылазаашьа аиӷьтәра, зыҩаӡара ҳараку акадрқәа реиҵааӡара, еиҵагыло абиԥарақәа рааӡара, азакәани азинеиҿкаареи рыдгылара зылшо, аҳәынҭқарратә, ааглыхратә, аҭҵаарадырратә, асоциал-культуратә, ауаажәларратә, агәыҳалалратә ус аҿы аихьӡарақәа змоу атәылауаа.