АҞӘА, нанҳәа 27 - Sputnik. Украинатәи артиллериа хынтә Запорожтәи Атомтә фымцастанциа иеихсит ҳәа аанацҳауеит Урыстәыла Атәылахьчара аминистрра.
"Зынӡа аснариадқәа 17 агәыдҵан, урҭ рахьтә ԥшьба иҷыдоу аргылара №1 ахыб иаахеит, уа иҵәахын америкатәи аиадертә былтәы "ВестингХаус" 168 шьақәгыла", - ҳәа ануп адырраҭараҿы.
Аусбарҭаҿы уи адагьы иазгәарҭеит даҽа жәа-снариадк шыԥжәаз аус зыдулоу аиадертә былтәы ахьыҵәаху азааигәара, даҽа хԥа - аиадертә былтәы "ТВЭЛ", арадиоактивтә црыҵқәа рыҵәахырҭа ахьышьҭоу иҷыдоу ахыбра №2, икьакьоу арадиоактивтә црыҵқәа рыҵәахырҭа азааигәара.
Атәылахьчара аминистрра аҳәамҭа ҟанаҵеит ишхысуаз Днепропетровтәи аобласт аиланхарҭа Марганец аҟынтәи, уа игәарҭеит иагьԥыржәеит америкатәи агаубица М777.
Урыстәыла изныкымкәа адунеитә еилазаара адырра арҭахьан Киев Запорожтәи Атомтә фымцастанциа иахьеихсуа иаанаго аиадертә терроризм ауп ҳәа. Астанциаҿы авариа ҟалар, уи ахҟьаԥҟьақәа Чернобыли Фукусимеи раасҭагьы еицәахоит, усҟан уи Украинеи Урыстәылеи рыдагьы, Европа егьырҭ атәылақәагьы ирԥырхагахоит.